فیچەرێک لەسەر ئەندازیاری گەڕەکە کۆنەکانی کۆیە دروست دەکرێت

2021-05-29

3753 جار خوێندراوەتەوە

+ -

چەند خوێندکارێکی بەشی ئەندازیاری تەلارسازیی زانکۆی کۆیە سەرقاڵی دروستکردنی فیچەرێکن لەسەر گەڕەکە کۆنەکانی کۆیە.

سەرهەند خالید کە ڕێکخەری کارەکەیە بە ماڵپەڕی ئێن ئاڕ تی دووی ڕاگەیاند:  ئامانج لە کردنی کارێکی لەو شێوەیە بڵاوکردنەوەی ھۆشیاریی تەلارسازییە و پیشاندانی هەندێک تایبەتمەندی کۆیەیە، کە ھەر کوچە و کۆڵانێکی دەشێت  وەک شوێنەوارێک ببینرێتەوە، زۆر خەمھێنە کە ساڵامە خانووە کۆنەکان دەبینین  وردە وردە بەرەو داڕمان و لەناوچوون دەچن، ھەمیشە لەناوچوونی شووێنە دێرینەکان واتە لەناوچوونی کۆمەڵێک چیرۆکی پڕ ڕاز.

وتیشی: دەشێت بپرسین چ جۆرە باڵەخانەیەک ناسنامەی ئێمە دیاریدەکات؟ تاوەرێکی پێنج ئەستێرەیی یاخود خانویەکی دێرین؟ بە ھۆی ئەوەی کۆیە خاوەنی شوێنەوارێکی زۆرە، بە باشمان زانی لەو باڵەخانانە بکۆڵینەوە کە رۆژانێک مەلای گەورە و دڵدار و حاجی قادری تێدا ژیاوە.

ڕونیشیکردووەتەوە، کارەکەیان بۆ زمانەکانی عەرەبی و ئینگلیزی و فارسی وەردەگێڕدرێت،  هیوادارن بەم کارەیان کەلێنێکی مەعریفی تەلارسازیی و کلتوری بوارەکە پڕبکاتەوە.

سەرهەند ئاماژەی بەوەدا، ئەوان کۆمەڵێک خوێندکاری قۆناغی چواری بەشی تەلارسازین لە زانکۆی کۆیە، کەناڵیێکی یوتوبی تایبەت بەخۆیان هەیە بە مەبەستی بڵاوکردنەوەی کارەکانیان بەناوی "بیرمەندان"، تەواوی کارەکانیان خۆبەخشییە.