ژمارەیەک توێژەری پەیمانگای ماساچوسێتسی ئەمریکی تەکنەلۆجیایەکی نوێیان گەشە پێداوە کە یارمەتی زیرەکیی دەستکرد دەدات بۆ بینینی مرۆڤەکان لەپشت دیوارەکانەوە.

تەکنەلۆجیا نوێیەکە ناونراوە"RF-Pose"، کە پێکهاتووە لە ڕادیۆیەکی هەوایی و سیستمێکی زیرەکی دەستکرد کە بەیەکەوە کاردەکەن.

لەمیانەی توێژینەوەکەدا پسپۆڕەکان ژمارەیەک تاقیکردنەوەیان ئەنجامداوە لەڕێگەی کامێراوە، کە تیایدا چاودێری خۆبەخشەکانیان کردووە لەکاتی دانیشتن و هەستان و پاڵکەوتن و هەندێک شێوازی تر، هەروەها لەناو زیرەکییە دەستکردەکەدا لەڕێگەی ئامێرێکی وەرگرەوە هەموو زانیاری و داتاکانیان تۆمار و خەزن کردووە.

بە یارمەتی ئەو داتا و زانیارییانە و ئامێرە وەرگرە ڕادیۆییەکەوە، زیرەکییە دەستکردەکە زانیاری خەزنکراوی دەستکەوت کە وایلێدەکات کەسەکان و جوڵەکانیان جیابکاتەوە تەنانەت ئەگەر بێتو لەپشت دیوارەکانیشەوە بن.

زاناکان هیواخوازن سود لەم داهێنانە نوێیە وەرگرن لە چالاکییەکانی ڕزگارکردندا لەکاتی ڕووداوە سروشتییەکان و هەروەها بۆ چاودێریکردنی ئەو نەخۆشانەی کە تووشی خڵەفاوی بوون.

هـ،ڕ