تۆڕی کۆمەڵایەتی سناپچات لەلای هەزاران بەکارهێنەرانی لە کارکەوتووە، کۆمپانیاکە داوا لە بەکارهێنەران دەکات کە لە بەرنامەکە نەچنە دەرەوە.

بەگوێرەی ماڵپەڕی ئێکسپرێسی بەریتانی ئاماژە بەوەکراوە، سناپچات لەلای هەزاران بەکارهێنەر لەکارکەوتووە و لە ئێستادا تووشی هەندێك کێشە بووە.

بەهۆی ئەو کێشەیەشەوە %٥٠ بەکارهێنەرانی سناپ چات ناتوانن چاتی بەرنامەکە بەکاربهێنن و هیچ نامەیەکیان بۆ نایەت، %٣٠ بەکارهێنەرانیش ناتوانن کۆنێکتی ئینتەرنێت بن، بەشێکی دیکەشیان هەردوو کێشەکەیان بەیەکەوە هەیە.

کۆمپانیای سناپچات لە هەژماری تایبەتی خۆی لە تویتەردا لە ڕێگەی تویتێکەوە ڕوونکردنەوەی لەبارەی ئەو دۆخەوە داوە و نوسیویەتی: سناپ لە ئێستادا کێشەی تێدایە و ئەندازیاران کاردەکەن بۆ چاککردنەوەی کێشەکان، لەم دۆخەشدا ڕێنمایی بەوە دەدەن کە لە ناو بەرنامەکە بمێننەوە و "log out نەکەن".

لە تویتەکەدا دەڵێن: ئێمە کار لەسەر چاککردنەوەی کێشەکە دەکەین، لەم کاتەشدا داواتان لێدەکەین لە ناو بەرنامەکە بمێننەوە، واتە "log out" نەکەن و چاوەڕوان بن تا کاتی چاککردنەوەی کێشەکە.