سەرچاوەیەک لە وەزارەتی پێشمەرگە بە ئێن ئاڕ تی راگەیاند، تا ئێستا موچەی لیوا هاوبەشەکان و دیوانی وەزارەتی پێشمەرگە دابەشنەکراوە و دوو رۆژە پێیان دەڵێن، "ئەمڕۆ نا سبەی."
بەگوێرەی ئەو سەرچاوەیە، ئەمڕۆ لەناو وەزارەتی پێشمەرگەدا پێیان وتوون، "بۆ ئەم مانگەش سێ موچە دەدرێت بە لیوا هاوبەشەکان و بەشێکی دواکەوتنەکە پەیوەندی بەو سێ موچەیەوە هەیە."
ئەوەشی خستووەتەڕوو، "تا ئێستا تەنها موچەی یەکەی ٧٠ و یەکەی ٨٠ دابەشکراوە"، بەرپرسانی وەزارەتەکەش، داوایان لە لیوا هاوبەشەکان کردووە کە دان بە خۆیاندا بگرن و کێشەکە لە نزیکترین کاتدا چارەسەر دەکەن.
بەرپرسانی وەزارەتی پێشمەرگە، ئامادەنین لەسەر ئەو کێشەیە قسەبکەن، بەڵام بەپێی زانیارییەکانی ئێن ئاڕ تی، وەزارەتی پێشمەرگە چاوەڕوانی پارەی هاوپەیمانان دەکات.
هێرش قادر، هەولێر