فۆتۆ:
2021-02-20
1910 جار خوێندراوەتەوە
کۆمپانیای فایزەر – بایۆنتیک ئاشکرایکرد، بەگوێرەی زانیارییەکانی ئیدارەی خواردن و دەرمانی ئەمریکی، دەتوانرێت ڤاکسینەکەیان لە بەفرگری ئاساییدا هەڵبگیرێت و بپارێزرێت.
بەگوێرەی زانیارییەکان، ڤاکسینەکە دەتوانرێت لە پلەیەکی گەرمی ئاسایی لە ئامێرەکانی بەفرگر و بەستنی دەرمانخانەکان هەڵبگیرێت و بپارێزرێت.
لە کاتی پەسەندکردنی زانیارییەکانی ئیدارەی خواردن و دەرمانی ئەمریکا، مەرجەکانی هەڵگرتن و پاراستن و گواستنەوەی ڤاکسینی فایزەر- بایۆنتیک ئاسانتردەبێت. لە ئێستادا و بەگوێرەی کۆمپانیاکان دەبێت ڤاکسینەکە لە ٧٠ پلەی سەدەی ژێر سفرەوە هەڵبگیرێت و بپارێزرێت. ئەمەش بۆ ئەو وڵاتانەی ژێرخانی ئابووریان نزمە و پلەی گەرمی تێیاندا بەرزە گرفتی هەڵگرتن و پاراستنی ڤاکسینەکەیان هەیە.
هاوکات، ئەو زانیارییە نوێیانەی خراونەتە بەردەم ئیدارەی خۆراک و دەرمانی ئەمریکا داوادەکات رێگە بدرێت لەکاتی پێویستدا و بۆ ماوەی دوو هەفتە ڤاکسینەکە لەو شوێنانەی پلەی گەرمیان لە نێوان ٢٥ بۆ ١٥ پلەی ژێر سفری سەدین لە ئامێری فێنککەرەوەی ئاساییدا هەڵبگیرێن.
ئەمە لە کاتێکدایە، هەریەک لە کۆمپانیای فایزەر- بایۆنتیک و مۆدێرنا لە ئەمریکا مۆڵەتی بەکارهێنانی ڤاکسینەکانیان بەشێوەی کتوپڕ پێدراوە و بەشێوەیەکی بەرفراوان لەو وڵاتە دابەشدەکرێت و دەست بە کوتانی هاوڵاتیان کراوە.
