لە گرتەیەکی ڤیدیۆییدا پیاوێکی میسری دەردەکەوێت، کە بانگەشەی ئەوە دەکات "مەهدی چاوەڕوانکراو و مەسیحی کوڕی مەریەمە"، دەسەڵاتدارانی میسریش دەڵێن، "ئەو کەسە باری دەروونی ناجێگیرە."
ئەو پیاوە لە میسرە و دەڵێت، "خەڵکینە من حەوت ساڵ لە نێوانتاندا دەمێنمەوە و پاش گیان لەدەستدانم قیامەت هەڵدەستێت و ژیان و دنیا کۆتاییان پێدێت".
هاوکات، لەلایەن خۆیانەوە دەسەڵاتدارانی میسر رایانگەیاند، ئەو هاوڵاتییە گرفتی دەروونی هەیە.
ئەوەش لە کاتێکدایە، نۆ رۆژ لەمەوبەر و لە کۆتا رۆژی مانگی ئایاردا، رووداوێکی هاوشێوە لە کوردستاندا و بە دیاریکراوی لە قەزای رانیە روویدا، کە دواتر لایەنە پەیوەندیدارەکان ئاشکرایانکرد، ئەو کەسە لە تەمەندا بووە و گرفتی دەروونی هەبووە.