لە ئامارێکی نوێدا، روانگەی سوری بۆ مافەکانی مرۆڤ ئاشكرایکرد، لەسەرەتای دروستبوونی پشێویی و ئاڵۆزییەکانی سوریاوە لەساڵی ٢٠١١دا، نزیکەی ٤٩٨ هەزار و ٤٣٨ کەس کوژراوان و لەدوایین ئاماریشدا، زیاتر لە ٣٨٨ کەس لە ئازاری ئەمساڵدا، کوژراون.

لە سەرەتای ئەمساڵەوە ڕوانگە توانیویەتی کوژرانی ١٠٥ هەزار و ١٥ کەس تۆمار بکات، زۆرینەی ئەوانەی کوژراون لە کۆتایی ساڵی ٢٠١٢ و کۆتایی ساڵی ٢٠١٥ دا کوژراون، لەنێویشیاندا ٤٢ هەزار و ١٠٣هاوڵاتی مەدەن هەن، بەشێکی زۆری ئەو هاوڵاتیە مەدەنیانە لەژێر ئەشکەنجەدان و زیندانەکانی ڕژێمی سوریادا گیانیان لەدەستداوە.

هاوشێوەی وڵاتانی دیکەی رۆژهەڵاتی ناوەڕاست؛ سوریا شەپۆلێکی ئاشتیانە و دیموکراسیانەی دژ بە حوکمی خێزانی ئەو وڵاتە بەخۆیەوە بینی، بەڵام دواتر بە شەڕ و ململانێی ناوخۆیی و کەرتبوونی وڵاتەکە لەنێوان چەند هێزێکی ناوخۆیی بەپاڵپشتی دەرەکی لێکەوتەوە و پاش ١١ ساڵ، تا ئێستاش بەردەوامە.

ئێستا، سوریا لەنێوان هێزەکانی حکومەت، هێزە کوردییەکان، میلیشیاکانی تورکیا و گروپی چەکداری داعشدا دابەش بووە، سەرباری دەستێوەردانی وڵاتانی وەک ئەمریکا، روسیا، تورکیا، ئێران و ژمارەیەک لە وڵاتانی دیکەی ناوچەکە و جیهان.