لە هەرێمی بریتیش کۆڵۆمبیا لەکەنەدا لە قوتابخانەیەکی نزیک لە کاملۆبس گۆڕێکی بەکۆمەڵ دۆزرایەوە کە تەرمی ٢١٥ منداڵی تێدابوون.
رۆزان کازیمیر سەرۆکی خێڵی تیکێملوبس تی سکویبیمک رایگەیاند، لەناو تەرمەکاندا منداڵ هەیە تەمەنی کەمترە لە سێ ساڵ، ئەمەش زیانێکە ناتوانرێت وێنابکرێت، دەشڵێت، پێشتر باس لە رووداوەکە کراوە، بەڵام بەرپرسانی قوتابخانەکە پشتراستیان نەکردووەتەوە و هیچ بەڵگە و دۆکیومێنتێکیان ئاشکرا نەکردووە.
سەرۆکی خێلەکە ئاماژەی بەوەشدا، خێلەکەیان لەگەڵ لیژنەیەکی پزیشکی دادوەری و مۆزەخانەکان دەستیان بە لێکۆڵینەوەکان کردووە لە پێناو دۆزینەوەی هەر تۆمارێک بەناوی ئەو منداڵانەوە.
هاوکات، جاستین ترۆدۆ سەرۆکوەزیرانی کەنەدا لە تویتەری خۆی بڵاویکردەوە، "دۆزینەوەی ئەو تەرمانە دڵ وێراندەکات"، دەشڵێت، "ئەمە یادەوەرییەکی ئازاربەخشە لەو قۆناغە تاریک و شەرمەزارکارییەی وڵاتەکەمان".
کاملۆبس بریتیبووە لە گەوترین بەشە ناوخۆیی قوتابخانەیەک کە لەلایەن کڵێسایەکی کاسۆلیکیەوە لە نێوان ساڵانی ١٨٩٠ بۆ ١٩٦٩ بەڕێوەبراوە و نزیکەی ٥٠٠ خوێندکاری گرتووە.
نزیکەی ١٥٠ هەزار کوڕ و کچی دانیشتوانی بنەڕەتی ناوچەکە ناچارکراون پەیوەندی بە خوێندنگاکەوە بکەن و روبەڕوی لێدان و ئەشکەنجەدان و دەستدرێژی سێکسی بوونەتەوە.
بەگوێرەی ئەنجامی لێکۆڵینەوەی لیژنەی لێکۆڵینەوەکان و بەدواداچوون دەرکەوتووە، لەو قوتابخانەیەدا نزیکەی سێ هەزار و ٢٠٠ منداڵ بەهۆی خراپی مامەڵەکردن و گوێپێنەدانیانەوە گیانیانلەدەستداوە، هێشتا وردەکاری ورد و دروست زۆرماون لەبارەیەوە بدۆزرێتەوە و ئاشکرا بکرێت.
ئەمە لەکاتێکدایە، لە ساڵی ٢٠٠٨ حکومەتی کەنەدی بەفەرمی داوای لێبوردنی لە خێڵەکەکرد و رووداوەکەشی بە "کۆمەڵکوژی کەلتوری" وەسفکرد و بڕی یەک ملیار و ٦٠٠ ملیۆن دۆلاری ئەمریکی "یەک ملیار و ٩٠٠ دۆلاری کەنەدەی" وەک قەرەبوو دا بە خانەوادەی قوربانییەکان.
