فەرماندەی گشتی هێزەکانی سوریای دیموکرات رایگەیاند، ناڕەزایی و خۆپیشاندانی هاوڵاتیانی رۆژئاوا لەسەر بڕیارەکانی ئیدارەی خۆسەری، ئاماژەی ئەوەیە ئیدارەی رۆژئاوا لەسەر بنەمایەکی دروست هەنگاو دەنێت.
مەزڵوم کۆبانێ فەرماندەی گشتی هێزەکانی سوریای دیموکرات لە تویتەر پەیامێکی لەبارەی ناڕەزای و خۆپیشاندانی هاوڵاتیانی ئیدارەی خۆسەری بڵاوکردەوە و رایگەیاند، "لە هەوڵەکانی ئیدارەی خۆسەری تێدەگەن بۆ گۆڕانکاریکردن و دابینکردنی پشتیوانی دارایی بۆ کەرتەکانی کارەبا، ئاو، خوێندن و تەندروستی، بەڵام دەبێت بڕیارەکانیان شەفافیەتی هەبێت".
ئەوەشی خستەڕوو، ئیدارەکە دەبێت لێکۆڵینەوەی تەواو بکات پێش خستنەبواری جێبەجێکردنی هەر بڕیارێکەوە.
ئاماژەی بەوەشکرد، پێویستە هاوڵاتیانیش ئەرکی سەرشانی خۆیان جێبەجێ بکەن و رێگەنەدەن کێشەکان ببێتەهۆی دروستبونی بۆشایی و نائارامی لە ناوچەکەدا.
ئەوەش لەکاتێکدای، لە ١٧ی ئەم مانگەدا، ئیدارەی خۆسەری رۆژائاوا بریاریدا، نرخی سوتەمەنی بە ڕێژەی لەسەدا ١٠٠ بۆ لەسەدا ٣٠٠ بەرزبکاتەوە، ئەوەش ناڕازای و خۆپیشاندانی هاوڵاتیان لێکەوتەوە، بەو هۆیەوەشەوە، ئیدارەی خۆسەری بڕیارەکەی هەڵوەشاندەوە.