میدیاکانی ئێران ناوی کاندیدانی وڵاتەکەیان بۆ هەڵبژاردنی سەرۆکایەتی ئەو وڵاتە بڵاوکردەوە کە لە مانگی داهاتوودا بەرێوەدەچێت. هاوکات، تا ئێستا ١٣٠ کەس خۆیان کاندیدکردووە کە لەناویاندا عەلی لاریجانی و کوڕی رەفسنجانی و مەحمود ئەحمەدی نەژاد لە دیارترینیانن.
ئەمڕۆ شەممە، وتەبێژی دەستەی هەڵبژاردنی ئێران بە میدیاکانی رایگەیاند، ١٣٠ کەس خۆیان بۆ سەرۆکی ئەو وڵاتە کاندیدکردووە.
ئەوەشی خستەڕوو، عەلی لاریجانی، سەرۆکی پێشووی پەرلەمانی ئێران و موحسین هاشمی، سەرۆکی شارەوانی تاران و کوڕی هاشمی رەفسەنجانی، سەرۆکی پشوتری رەوتی چاکسازی و دەستەی باڵای بەرژەوەندیەکانی ئەو وڵاتە لە کاندیدە دیارەکانن.
باسی لەوەشکرد، مەحمود ئەحمەدی نەژاد، سەرۆکی پێشووی ئێران و مەسعود پزیشکی، جێگری سەرۆکی پێشووتری پەرلەمانی ئێران و ئیبراهیم رەئیسی، سەرۆکی دەسەڵاتی دادوەری وڵاتەکە و حسێن دەهقان، وەزیری پێشوتری بەرگری و سادق خەلیلیان، وەزیری پێشووتری کشتوکال و سەعید محەمەد، سەرۆکی پێشوی بارەگای خاتەم ئەنبیا و موحسین رەزایی، ئەنداری کۆمەڵەی دەستنیشانکردنی بەرژەوەندی سیستمی ئەو وڵاتە خۆیان بۆ سەرۆکی ئێران کاندید کردووە.
ئاشکراشیکرد، لەئێراندا ٥٩ ملیۆن و ١٣٠ هەزار و ٣٠٧ کەس مافی دەنگدانیان هەیە و ملیۆنێك و ٣٩٢ هەزار و ١٤٨ هەزار کەسی دیکە یەکەم جاریان بەشداری هەڵبژاردن بکەن.
ئاماژەی بەوەشدا، لە ٢٦ و ٢٧ی ئەم مانگە دوای ئەوەی ناوەکان لەلایەن ئەنجومەنی پاراستنی دەستور کە سەرپەرشتی هەڵبژرادنەکان دەکات لیستی ناوی کاندیدەکانی پشتڕاستکردەوە و رێگەیدا بەفەرمی بڵاوبکرێنەوە.
باسی لەوەشکرد، بانگەشەی هەڵبژاردن لە ٢٨ی ئەم مانگە تا ١٦ی حوزەیران هەڵمەتی بانگەشەی هەڵبژاردن دەستپێدەکات و بۆ ماوەی ٢٠ رۆژ بەردەوامدەبێت و لە ١٧ی حوزەیران کۆتایی بە هەڵمەتەکە دێت و لە ١٨ی حوزەیران دەرگای بنکەکانی دەنگدان بەڕوی هاوڵاتیاندا دەکرێتەوە.