دادگای تاوانەکانی کەرخ لە شاری بەغدای پایتەخت رایگەیاند، دوای ئەوەی ١٣ کەس دانیاننا بەوەی سەربە گروپی چەکداری داعشن و تاوانیان ئەنجامداوە، دادگاکە سزای لە سێدارەدانی بۆ دەرکردن.
ناوەندی راگەیاندنی ئەنجومەنی دادگای باڵا راگەیەنراوێکی بڵاوکردەوە و تیایدا هاتووە، "تۆمەتبارەکان دانیان بەوەداناوە لە مانگی رەمەزانی ٢٠١٩ کاری تیرۆرستیان ئەنجامداوە".
لە بەشێکی دیکەی راگەیەنراوەکەدا هاتووە، دادگا بەڵگەکانی بینیوە کە دەیسەلمێنێت ئەو ١٣ کەسە سەربە گروپی چەکداری داعشن و لەکاتی دەستگیرکردنیاندا چەک و پێناسی ساختەیان پێبووە.
لەلایەکی دیکەوە، شانەی راگەیاندنی ئەمنی عێراق لە راگەیەنراوێکیدا دەستگیرکردنی نۆ ئەندامی گروپی چەکداری داعشی لە پارێزگای کەرکوک راگەیاند.
بەگوێرەی راگەیەنراوەکە، یەکێک لە دەستگیراوەکان ژنە و سەرجەمیان لەلایەن مەفرەزەکانی ئاژانسی هەواڵگری و لێکۆڵینەوەی فیدڕاڵی سەر بە وەزارەتی ناوخۆ دەستگیرکراون.