کەشناسێکی عێراقی دەڵێت، لە رۆژانی داهاتوودا شەپۆلێکی گەرمی هاوینە روو لە چەند ناوچەیەکی جیاوازی عێراق دەکات.
حسێن ئەسەدی شارەزای بواری کەشناسی عێراقی رایگەیاند، لەم چەند رۆژەدا و بەتایبەت لە سەرەتای هەفتە داهاتوودا یەکەم شەپۆلی گەرمای هاوینە روو لە چەند ناوچەیەکی عێراق دەکات.
ئاماژەی بەوەشکردووە، لە چەند ناوچەیەکی ناوەڕاست و باشوری عێراق پلەکانی گەرما بۆ ٥٠ پلەی سیلیزی بەرزدەبێتەوە.
حسین ئەسەدی ئەوەشی خستووەتەڕوو، بە پێچەوانی ئەو ناوچانەی پلەکانی گەرما تێیدا بەرز دەبێتەوە، لە باکور و خۆرئاوای عێراق پلەی کەمتر تۆماردەکات.
ئەوەش لەکاتێکدایە، ماوەیەکە پلەکانی گەرما بە تەواوی روویان لە بەرزبوونەوە کردووە و لە هەندێک ناوچەدا بە بەردەوامی دەگاتە سەروو ٤٤ پلەی سیلیزی، لە ماوەی سێ رۆژی رابردووشدا پلەکانی گەرما لە پارێزگای سلێمانی بە گەرمترین دانراون لە عێراقدا.