بەپێی راگەیەندراوێکی وەزارەتی بازرگانی عێراق، پلانی بەشەخۆراکی مانگانەی هاوڵاتیان گۆڕانکاری تیاداکراوە و تەواوی پارێزگاکانی عێراق بە شارەکانی هەرێمی کوردستانیشەوە گۆڕانکارییەکە دەیگرێتەوە.

ئەوەشی خستووەتەڕوو، بەشێک لە خۆراکەکانی بەشەخۆراکی مانگانە وەکو خۆی دەمێنێتەوە، کە زەیت و شەکر و برنج و ئارد لەخۆدەگرێت، بەڵام دۆشاوی تەماتە و فاسۆلیا و نۆکیشی بۆ زیاددەکرێت.

ئاماژەی بەوەشداوە، گرێبەستیان لەگەڵ کۆمپانیایەك کردووە بۆ دابینکردنی بەشەخۆراکی هاوڵاتیان و لەمانگی داهاتووەوە هەر حەوت جۆرەکە دابەشدەکرێت.

ئەمەش لەکاتێکدایە، لە مانگی کانوونی دووەمی ئەمساڵدا، حەسەن کەعبی جێگرى یەکەمى سەرۆکى پەرلەمانی عێراق دڵنیاییدا کە لە بودجەی ئەمساڵدا، بودجەی پێویستییان بۆ بەشەخۆراکى مانگانەى هاوڵاتیان دابینکردووە و ئاماژەی بەوەشکردبوو، "دەبێت بەشەخۆراکی ئەمساڵ جیاوازتر بێت لە ساڵانی رابردوو."

سیستمی بەشەخۆراکی مانگانە لە عێراقدا بە گوێرەی بڕیاری ژمارە ٩٨٦ی ئەنجومەنی ئاسایشی نێوەدەڵەتی لە ١٤ی نیسانی ١٩٩٥ دەرچوو و لەمانگی ئایاری ١٩٩٦ـەوە کەوتە بواری جێبەجێکردنەوە و ٩٠% خێزانە عێراقییەکان بەشێوەیەکی سەرەکی پشتیان پێدەبەست و تا ئێستاش کاریگەری لەسەر ژمارەیەکی زۆر لە خێزانەکان هەیە.

ئ. م