وەزارەتی دەرەوەی ئێران رایگەیاند، هەرکاتێک حکومەتی عێراق ڤیزای لەسەر هاوڵاتیان و گەشتیارانی ئەو وڵاتە هەڵگرت، ئەوا ئێرانیش ئامادەیە ڤیزا لەسەر هاوڵاتیانی عێراق هەڵبگرێت، بە هەرێمی کوردستانیشەوە.
سەید رەسوڵ موهاجیر، یاریدەدەری وەزیری دەرەوەی ئێران بۆ کاروباری دبلۆماسییەتی ئابوری، لە کۆبوونەوەیەکیدا لەگەڵ بازرگانانی ئێرانی و عێراقی لە بەغدا، رایگەیاند، حکومەتی ئێران ئامادەیە ڤیزا لەسەر گەشتیارانی عێراق هەڵبگرێت.
ئاماژەی بەوەشدا، هەرکاتێک حکومەتی عێراق ڤیزای لەسەر هاوڵاتیان و گەشتیارانی ئێران هەڵگرت، ئەو کاتە ئێرانیش ڤیزا لەسەر هاوڵاتی و گەشتیارانی عێراق هەڵدەگرێت.
باسی لەوەشکرد، ئەوان تا ئێستا چاوەڕێی وەڵامی حکومەتی عێراقن و هەرکاتێک عێراق ئامادەبوو ڤیزا هەڵبگرێت، ئەوا هاوڵاتی و گەشتیارانی هەردوو وڵات دەتوانن بە بێ ڤیزا سەردانی وڵاتی یەکتری بکەن.