وتەبێژێک بەناوی فەرماندەیی گشتی هێزە چەکدارەکانی عێراق رایگەیاند، دەزگای دژەتیرۆری عێراق پێنج چەکداری داعشی دەستگیرکرد، کەچواریان لەپارێزگاکانی عێراق و یەکێکی دیکەشیان، لە پارێزگای کەرکووک بووە.
ئەمڕۆ شەممە، یەحیا رەسوڵ وتەبێژ بەناوی فەرماندەیی گشتی هێزە چەکدارەکانی عێراق لە راگەیەندراوێکدا باسی لەوەکرد، لەهەڵمەتێکی هێزەکانی دژەتیرۆر و هێزەکانی دیکەی حکومەتی عێراقیدا، پێنج چەکداری داعش لە چەند پارێزگایەکی عێراق دەستگیرکران.
لەراگەیەندراوەکەدا هاتووە، دوو چەکداری داعش لە پارێزگای بەغدا و دووانی دیکەیان لەناوچەی کەریمەی سەربە شاری فەللوجەی پارێزگای ئەنبار، و چەکدارێکی دیکەیان لە پارێزگای کەرکوک، دەستگیرکراون.
دوێنێتش، یەحیا رەسوڵ لەراگەیەندراوێکدا ئاماژەی بەوەدا، لەهەڵمەتێکی هێزەکانیاندا، سێ سەرکردەی داعشییان لە باشووری شاری بەغدا کوشتووە و سەرکردەیەکی دیکەی ئەو گروپەشیان دەستگیردکردووە.
بەگوێرەی ئامارەکانی دەزگای روبەڕوبوونەوەی تیرۆری سەر بە نەتەوەیەکگرتوەکانیش، ژمارەی چەکدارانی داعش بە ١٠ هەزار چەکدار خەمڵێندراوە، لەکاتێکدا بەرپرسانی باڵای سەربازی ئەمریکا، ژمارەی چەکدارانی ئەو گروپە بە ١٤ تا ١٦ هەزار چەکدار لە عێراق و سوریا دەخەمڵێنن.