کۆبوونەوەى سەرۆکایەتی پەرلەمان و لیژنەکانی یاسایی و دارایی لەسەر یاسای چاکسازی لە موچە و دەرماڵە دەستیپێکردووە.
هێرش قادر ، هەولێر
کۆبوونەوەى سەرۆکایەتی پەرلەمان و لیژنەکانی یاسایی و دارایی لەسەر یاسای چاکسازی لە موچە و دەرماڵە دەستیپێکردووە.
پەیامنێری ئێن ئاڕ تی لە هەولێر ڕایگەیاند، بۆ دیاریکردنی رۆژی دانیشتنی پەرلەمان و تاوتوێکردنی یاسای چاکسازی خانەنشینی مووچە و دەرماڵە دەستەی سەرۆکایەتى پەرلەمان و لیژنەکانى دارایی و یاسایی لە کۆبوونەوەدان.
ئەمەش لە کاتێکدایە هەفتەی پێشووش لیژنەکانی دارایی و یاسایی کۆبوونەوە و دواتریش عەلی حەمە ساڵح ڕایگەیاند، لە هەمواری نوێی یاسایی چاکسازیدا چوار خاڵ جێگیرکراوە و سیستەمی پاشەکەوتیش لەگەڵ جێبەجێکردنى یاسای چاکسازی هەڵدەگیرێت و دەستکاری هیچ دەرماڵەیەکیش ناکرێت.
ئەو ئەندامەى پەرلەمانى کوردستان ڕاشیگەیاند، بە پێی هەموارە نوێیەکە هیچ خانەنشینێک موچەکەی لە ٤٠٠ هەزار کەمتر نابێت و دەستکاری هیچ جۆرە دەرماڵەیەکى موچەخۆرانیش ناکرێت و وەک خۆی دەمێنێتەوە.
پڕۆژه‌یاساى چاكسازى خانەنشینی، دوای بێنە و بەرەیەکی زۆری نێوان فراکسیۆنەکان، لە ڕۆژی ٢٧ى شوباتى ئەمساڵدا بەکۆى دەنگى پەرلەمانتارانى سەرجەم فراکسیۆنەکان پەسەندکرا، بەڵام ماده‌ى سێیه‌م كه تایبه‌ته به موچه و خانه‌نیشنى پله باڵاكان ناڕەزایی بەفراوانى لێکەوتەوە و چەندین خۆپیشاندان لەدژى ئەنجامدرا، بەو هۆیەشەوە پڕۆژه‌کە لە ڕۆژی ٤ی ئازار لەلایەن سەرۆکایەتى پەرلەمانەوە بە فەرمى گەڕێنرایەوە پەرلەمان بەمەبەستى هەموارکردنەوەى.
هـ،ڕ