شەرمزارکرنا ھێرشێن سەر پێشمەرگەی بھایێ لیرەکێ تورکی نائینیت

24541 جار خوێندراوەتەوە

چەندین سالن شەرێ پەکەکێ و تورکیا لسەر سنورێن ھەرێما کوردستانێ بەردەوامە بێ گومان یێن کو زەرەر دگەھیتە وان ب تنێ خەلکێ سڤیلە و دڤان سالێن داویێ دا ھەژمارەکا زۆر ژ وەلاتیان شەھید و برینداربوونە، بسەدان گوند لسنوران ھاتینە چولکرن ھەروەسا ب ھزارەھان دونەمێن وەلاتیان شەوتینە ژبەر شەرێ دناڤبەرا ھەردو ئالیاندا.
ھەیا نھا چ ئالی نە لسەر ئاستێ ناڤخۆ و نەژی لسەر ئاستێ دەرڤە ب جدی نەھاتنە سەرخەت بۆ رێگریکرنێ ل ڤان بویەران و دیتنا رێکە چارەسەریەکێ، رۆلێ بەرپرسێن ھەرێما کوردستانێ ژی بتنێ بەلاڤکرنا ئیدانە و شەرمزارکرنێ یە ب بەیاننامەیێن نڤێسکی و داخویانێن سەر شاشەیێن تیڤیایە، بێ گومان ئەو بەرپرسەژی ھەر ئێک چاڤ ل یێ دی دکەت و جرئەتا وێیەکێ نین لسەر ئاخا خۆ ژی نە بەحسێ پەکەکێ بکەن و نەژی بەحسێ تورکیا بکەن.
ب نێرینا من، ئەڤ ئیدانەکرن و شەرمزارکرنەژی بھایێ وان ناگەھیتە ھەمبەر لیرەیەکێ تورکی، ژبەرکو نە پەکەکە و نەژی تورکیا گوھداریا بەیاننامە و داخویانێن وان ناکەن، لەورا ژی پێتڤیە بەرپرسێن ھەرێما کوردستانێ لسەر ڤێ پرسێ و بتایبەتی ژی بەرپرسێن پارتی دیموکراتی کوردستان کو دەستھەلاتێ ل وێ دەڤەرێ بگشتی و سنورێ دەڤەرا بەھدینان بتایبەتی دکەت خۆ لسەر ڤێ پرسێ ئێکلابکەت، ژبەرکو نە پەکەکە و نەژی تورکیا ل دەڤەرا بەھدینان و باکورێ کوردستانێ بگشتی بێ ترس و دوو دلی ئەو کارێ ئەوان دڤێت ئەنجامددەن و زەرەرمەند ژی بتنێ وەلاتیێن وێ دەڤەرێ نە ھەم ژ روویێ گیانی و ھەم ژی ژ روویێ ماددی و ژیانێ ڤە.  
پەیوەندیێن پارتی و پەکەکێ: 
پەیوەندیێن پارتی و پەکەکێ کو ھەردوو دمەھێن تەباخێدا ھاتینە دامەزراندن، پەکەکە ١٥ی تەباخا سالا ١٩٨٤ێ و پارتی ١٦ی تەباخا سالا ١٩٤٦ێ، ب دریژاھیا وان سالان گەلەک ئالۆزی و شەر دناڤبەرا وان دا روویدانە، ھەتا گەھشتیە شەرێ ناڤخۆ دناڤبەرا ھەردوو ئالیاندا .
ل سالا ١٩٨٥، پشتی ئۆپەراسیۆنەکا لەشکەریا تورکیا دژی پەکەکێ، ئالۆزیان دناڤبەرا ھەردوو پارێتن کوردیدا دەستپێکر و ھەیا سالێن نوتان ژی بەردەوام بوو، ھندەک جاران شەڕ و پەڤچوونێن چەکداری و روبرووبونێ ژی دناڤبەرا ھەردوو ئالیاندا چێدبوونە و زیانێن مەزن گەھاندنە ئێک و دوو. 
ل سالا ١٩٩١ پشتی دەستپێکرنا ئۆپەراسیۆنەکا لەشکەری یا تورکیا، شەرەکێ بەرفرەھـ کو چەندین سالان بەردەوام بوو، تا سالا ١٩٩٧ێ، لھەڤھاتن لسەر ھاتەکرن و داویی ب شەری ھات .
ئالۆزیێن پەکەکە و پارتی پشتی ھێرشێن داعش ل سالا ٢٠١٤ بداویی ھاتن، و قوناغەکا نوو یا پەکەکێ دەستپێکر، ئەو ژی ل رۆژئاڤایێ کوردستانێ بوو پشتی کو ئەزموونا خۆبرێڤەبەریێ ل دەڤەرێن کوردی دەستپێکری کو پارتی ب دەستھەلاتا پەکەکێ بناڤ دکر.
ل ڤێ داویێ دیسان ب سەدەما ھێرشێن تورکیا بۆ سەر وان دەڤەرێن سنورێ باشورێ کوردستانێ کو پەکەکە لێ جھگیرە و دروستبوونا شەڕ و ئالۆزیان پەیوەندیا دەستھەلاتدارێن ھەرێما کوردستانێ کو پارتی ل وێ دەڤەرێ یە دگەل پەکەکێ دووبارە گەھشتیە ئاستەکێ مەترسیدار و ئارامی و ئاسایشا دەڤەرێ بگشتی دبن مەترسیێ دایە، لەورا پێتڤیە دەستھەلاتدارێن ھەرێما کوردستان و عێراقێ بجدی لسەر ڤی بابەتی بڕاوەستن و داخازێ ل جڤاکا ناڤدەولەتی و وەلاتێن زلھێز بکەن چارەسەریەکێ ببینن سەروەریا ھەرێما کورستانێ ب پارێزن، نەکو بتنێ داخویانی و بەیاننامەییان د پەیجێن خۆ یێن جڤاکی دا بەلاڤبکەن.