ته‌كنیكا مرۆڤى ژیانه لێ ته‌كنیكا ژیانێ ژی ئازادیه
2/16/2021 7:55:08 PM
2837 جار خوێندراوەتەوە
جوان عزەت
+
-
ئازادى نه تشته‌كه گرێداى به‌رگێ ده‌رڤه‌یێ مرۆڤان بیت، به‌لكو ئازادى حه‌قیقه‌ته‌كا راسته‌قینه‌یا به‌رگێ ناڤه‌ندا جه‌وهه‌رێ مرۆڤایه. ئازادى په‌یوه‌ندیه‌كا گرێدایى هشمه‌ند و روح و گیان و جه‌سه‌دێ مرۆڤبوونێ یه، هه‌رده‌مێ ئازادى بۆ نرخه‌كێ ئاسایى و به‌ره‌ڤ فه‌شارتنا حه‌قیقه‌تان چوو، وى ده‌مى مرۆڤ ژى دبیته بوونه‌وه‌ره‌كێ ئاسایى و به‌ره‌ڤ جیهانا خوه یا روخێنه‌ر و بێ نرخ ڤه دچیت. گه‌لۆ ئه‌م وه‌ك مرۆڤێن كورد چاوان ئازادیێ دبینن؟ ئه‌رێ ئازادى ته‌نها بیهستنه‌كه ب ده‌نگێ ئاراسته‌كه‌رێن بێ ووجود؟ یان ئازادى دیتنه‌ك و دایكه‌كه ب ئاراسته‌كه‌رێن پارێزه‌ڤان ڤه؟ ئه‌رێ ئازادى ته‌نها خوه ساربوون و گرتیكرنا حه‌قیقه‌تا یه؟ یان ئازادى ژ وان سنوورێن تێكه‌لى جیهانا راسته‌قینه‌یا مرۆڤان دبن خلاسى و رزگارى یه؟ ئه‌رێ ئه‌گه‌ر ئه‌م بێژین ئه‌م ئازادین ئه‌م ئازادیێن كیژ گوشه‌یێ نه ئه‌و گۆشه‌یا مه دكه‌ته د قالبێن پێچایى دا یان ئه‌و گۆشه‌یا مه دكه‌ته هه‌ڤالێن یاخیبوون و شوره‌شا ڤه‌خوارنا چایێ ب رزگاریا فكرا یێدى؟ ئه‌گه‌ر ئه‌م د ئازادین ئه‌رێ بۆ كیژ ئازادیێ دقیرین ئازادیا زیندان و خوه‌كوژیێ یان ئازادیا به‌رهه‌مداریێ؟ هه‌روه‌ها ئه‌گه‌ر بێژین ئه‌م هه‌ینه دا شه‌رێ هه‌ڤدوو بكه‌ین و هه‌ڤدوو تومه‌تباربكه‌ین، ئه‌رێ پا بۆچى مه ئه‌و هه‌بوونه نینه دا شه‌رێ فكران بكه‌ین و هه‌ڤپه‌یمانیا خوه یا ده‌وله‌تدارى و مرۆڤى و مرۆڤایه‌تى ته‌مام بكه‌ین؟ گه‌لۆ ما ئه‌م د واته‌یا ئازادیێ گه‌هشتینه هه‌تا بزانین كو ئازادى هوشیارى و رزگارى و وه‌لاتپارێزى و مرۆڤپارێزى و گیان پارێزى و گومان و مه‌زنبوونا رومه‌تا مرۆڤا یه؟ د ڤى بوارى دا هێگل دبێژیت: "مرۆڤ ته‌نها ب سه‌ركێشیكرن و رویسكرنا ژیانێ دشێت ئازادیێ بده‌سڤه‌بینیت". ئه‌گه‌ر مرۆڤ ئازاد نه‌بن ئه‌رێ ما سرۆشت و گیان و روح دشێن ئازاد ببن؟ ئانكو، "ئه‌م نه‌شێن ئازاد ببین هه‌تا یێدى ئازاد نه‌كه‌ین/ سارته‌ر". هه‌روه‌ها نه‌شێن خواندنێ بۆ شه‌لاندنا ته‌كنیكا ژیانێ بكه‌ین هه‌تا ئه‌م نه‌بینه به‌رگریكار و ناسێنه‌رێن هشمه‌ندیه‌كا ئازاد و هوشیار و جیهان ناس.
ئه‌ڤ پارچه نڤیسه دیارى ژ بۆ گرتیێن رییا ئازادیێ و دبێژم، ئازادى نه ته‌نها په‌یداكرنا نان و ئاڤێ یه، به‌لكو ئازادى مه‌یدانا شه‌رێ حه‌قیقه‌تێ یه. ئه‌و حه‌قیقه‌تا كو رونیا ژیانێ دناڤا زیندانه‌كا تارى دا واته‌دار دكه‌ت. ئازادیێ ژ بۆ ڤان به‌رگریكاران دخوازم و دبێژم حه‌قیقه‌ت ئه‌وه مرۆڤ د شه‌رى بگه‌هیت و شه‌ر ژى ئه‌وه مرۆڤ د ئه‌ركى بگه‌هیت، ئه‌رك ژى ئه‌وه مرۆڤ کار ژ بۆ دەستڤەئینانا مافێن خوه بكه‌ت، له‌ورا ژى هه‌وه یا ل سه‌ر ملێن خوه ئه‌نجامدا، به‌لێ یا ماى ئه‌مین هه‌ر ئیك ژ مه ئه‌ركێ خوه ژ بۆ رزگاریا هه‌وه بجهبینیت.