سەرنووچە:

ئاکرێ دناڤبەرا بیکا نەورۆزێ و بیکا تەلاقدایی​

1/25/2021 4:25:43 PM
3718 جار خوێندراوەتەوە
غەفار زێباری
+ -

ئەرێ ژبەر چ ناڤێ ئاکرێ ب بیکا نەورۆزێ یان پایتەختێ نەورۆزێ ھاتیە بناڤکرن د ھەمان دەم دا ناڤەکێ دیژی پێرا ھاتیەگوتن کو دبێژنێ بیکا تەلاقدایی، باژێرەکە خوەدی جوگرافیەک جوانە چیا و دەشت و دول و نھال ھەنە، ژ رویێ دیروکی ڤە خودان شارستانیەتەکا مەزنە ژبەر ھندێ  ھەر سال ل ٢٠مەھا ٣ ل رۆژا ھەلکرنا ئاگرێ نەورۆزێ ئاکرێ جودا ژ ھەر دەڤەرەکا دی پێشوازیا ئەڤێ رۆژێ دکەت.

 سالانە زێدەتری ھزاران خەتیرێن ئاگری دروست دکەن و بەرەف بلنداھیا کەلھێ و کەلەکەڤنێ و تیشی دبەن لەورا ژبەر جوانیا دیمەنێن وێ ب بیکا نەورۆزێ یان پایتەختێ نەورۆزێ ھاتیە بناڤ کرن، لێ گەلۆ بۆچی دبێژنێ بیکا تەلاقدای؟ بێگۆمان سەرەرای جوانیا سیمایێ ئاکرێ کو بالا گەشتیاران بخوە رادکێشیت و خوەدی چەندین بەرھەمێن سروشتی یە کوسالانە بەرھەمەکێ باش بدەستڤە دھێت، لێ خەلکێ ئەڤی باژێری ب دەست نەبونا خزمەتگوزاریان دنالن، سەرەرای کو ئەڤ باژارە رۆژ ب ڕۆژ د فرەھبوونێ دایە، لێ ھەیا نھا خزمەتگوزاریێن ڤێ قەزایێ د یٔاست داخوازی و پێدڤیێن رونشتڤانێن وێ دا نینە، ب تایبەت ژی تا نھا یٔاکرێ خوەدی زانینگەھا تایبەت بخۆ  نییە و خواندەکارێن ڤی باژاری پشتی تەمامکرنا  قۆناغا دوازدێ، نەچارن بۆ درێژەدان ب پرۆسەیا خواندنێ  بەر ب  باژارێن دن یێن ھەرێمێ بچن، ھەروەسا کێموکاسیێن ڕێ و بانێن ڤی باژاری ئاریشەکا دیا سەرەکیا رۆنشتڤانێن ڤی باژاری یە، ئەڤە ژی د دەمەکی دایە ئاکرێ ناڤەندا ب ئێک گەھشتنا دەڤەرێن بادینان و سۆرانە، چ رێ یەکا تایبەت ب ھاتن و چوونا ترومبێلێن بارھەڵگر نییە و د ناڤەندا ڤێ قەزایێ دا ھاتن و چوونێ دکەن ئەڤەژی بوویە سەدەم کوو جادێن ڤێ دەڤەرێ بەر ب وێران بوونێ بچن.

 سەرباری ڤێ ژی، نەبوونا خزمەتگوزاریا ئاڤێ یەک ژ ئاریشێن سەرەکی یێن وەڵاتیێن ڤێ قەزایێ یە، ھەیا نھا ژی ھندەک جھێن ئاکرێ بدەست کێمیا ئاڤا ڤەخوارنێ دناڵن. یٔەڤە د دەمەکی دایە، چەندین ساڵە بڕیارا تەمامکرنا پرۆژێ "ئاڤا بێخمێ" دایە، لێ ھەیا نھا جێبەجێنەکریە،گەلەک جاران خەلکێ ئاکرێ باژێرێ خوە ب گوندەکێ مەزن پێناسە دکەن، بریارا جێبجێکرنا چەندین پرۆژان ھاتیەدان لێ ھەیا نھا ئەو بریار ب ھەلاویستی ماینە، رێژا بێکاریێ گەلەک زۆرە کو  ١٦ ھزار کەس د ئاکرێ دا د بێکارن،  ئەڤە د دەمەکی دایە کو ئاکرێ ل سالا ١٨٧٧ بوویە قەزا کو دوی دەمی دا گەلەک پارێزگەھێن مەزن یێن نھا نەبووینە، لەورا پێرا دھێتە گۆتن بیکا تەلاقدایی.

گەلەری