پێدڤیە جڤاک بایکوتا گەندەلان بکەت​

3176 جار خوێندراوەتەوە

گەندەلی واتە بکارئینانا کار یان پۆستەکێ گشتی بۆ مەرەمێن خۆیێن تایبەت کو پێکدھێت ژ (دزینا مالێ دەولەتێ، کنترولکرنا مولکان ، وەرگرتنا رەشوە و بەرتیلان و واستەکاری ..) کو ب رامانا دزینا مالێ گشتی دھێت کو د کەرتێ حکومی و کەرتێ تایبەت دا دھێتەکرن، د نھا دا گەندەڵی دیاردەکا جیھانیە و ل ھەر ولاتەکێ د ئاستەکێ جوودا دایە، ل ھەرێما کوردستانێ ژی ھەر ل سالا ۱۹۹۲ ھەیا نھا گەندەلی ھەبوویە، لێ ژبەر نەھوشیاریا وەلاتیان د بیاڤێ حکومرانی و ئیداریی دا د ناڤ وەلاتیان ب گەندەلی نەھاتیە ھژمارتن و "بکێر خۆ ھاتی" ھاتیە بناڤکرن، لێ پشتی سالا ۲۰۰٥ و بتایبەتی ل سالا ۲۰۰۹ ب ئاوایەکێ بەرفرەھـ و ئاشکرا گەندەلی ھاتیەکرن، ھەتا گەھشتیە وی ئاستی کو حکومەت و سەرۆکاتیا ھەرێمێ ژی نەشیاینە پەردەپۆش بکەن و بەحس ژ ھەبوونا گەندەلیێ کرینە بێ کو ریبریبوونەک بھێتەکرن، ھەڤدەم رێژە بەرەڤ زێدەیێ چوویە، یا زەلال و بەرچاڤە خودانێن سەرێن گر و باژێرێن ئاکنجیبوونێ و دونەمێن عەردی و بلوکێن دولاری ب کەدا خۆ نەگەھشتینێ و بەری سالا ۱۹۹۲ تێر ب زکێ خۆ نانێ ھشک ژی نەدخوار ن، ئەم ھەمی باش ھەڤدوو ناسدکەین و دزانین کی چ بوو و شیانێن ھەرکەسەکێ چبووینە.

ل ھەرێما کوردستانێ یەکەم پێنگاڤا توشبوون ب گەندەڵیێ وەرگرتنا پۆستەکێ حزبی یان حکومی یە، ھەیا پۆستەکێ ژی وەربگری پێدڤیە عەشیر رێگر نەبیت و ئاغا رازیبوونێ لسەر بدەن و خودان زوور مرۆڤ بیت ئانکو خەلک یێ پێڤەگرێدای بیت، دەما ب عەشائیری کەس دبنە خۆدان پۆست و دەولەمەندببن واتە لسەر حسابا تە دھێنە دانان، پێدڤیە ب عەشائیری چارەسەر بکەی، ژبەرکو تو د جڤاک و ناخێ خۆ دا عەشیرگەری، د دەمەکێ دا کو یاسا یا غایبە و چ دەورێ خۆ نینە د ڤان بابەتان دا، پێدڤیە ھەر کەسەک ژی ژ خۆ دەست پێ بکەت، بەرێخۆ بدە مالبات و گوندێ خۆ کی گەندەڵە؟ ھەمی د دیار و ئاشکرانە، و ھەمی ب مالێ تە یێن ستوور بووین، کەسێن بڤی ئاوایی دز ھێژایی سەرەدەریێ نینن و شەرمە تێکەلیێ دگەل بکەی و ژ وێ شەرمتر ئەوە کەسەک مەلاقی و خوشکاندنێ بۆ دزێ مالێ خۆ بکەت!.

پێدڤیە جڤاک ژ کەسێن گەندەل رزگار ببیت، ھەیا ھوون گەندەلان چارەسەر بکەن، پێدڤیە ھووین وان ریسوا بکەن، د ھەمی جڤات و سمینار و خرڤەبوون و شاھی و تازی و ھەلکەفتان دا تێکەلیێ دگەل نەکەن، خزماتی و ژن و ژنخوازیێ دگەل نەکەن و بازاران دگەل نەکەن، ھەر دەما بناڤێ مروڤانی و نیشتیمانی ئاخفت پشتا خۆ بدەنێ، بێژنێ " گەندەلان مافێ ئاخفتنێ نینە "، ھەردەما ھاریکاری پێشکێشکرن نەکەنە قاڕەمان د مەردینیێ دا و ھاریکاریان ژێ نەوەرگرن، تو چەند نزیکێ وی بی خۆ ژێ دوور بکە، ب کورتی پێدڤیە جڤاک بایکوتا گەندەلان بکەت، و ھەمی تێکەلبوون و سەرەدەریان دگەل قوود بکەن، ھەتا ھەست ب بیانی بوونا خۆ بکەت، و خەلک ب ھووری چاڤدێریا رێڤەبەریێن میری بکەت، ھەر بەلگەکێ گەندەلیێ ژ رێڤەبەراتیەکێ دیت، ل سوشیال میدیایێ بەلاڤ بکەن، دەما ھوشیاریا جڤاکی دگەل گەندەلی و گەندەلان گەھشتە ڤی ئاستی، حکومەت ژی دێ وی کەسی لادەت و نەچار بیت پێداچوونێ د خۆ دا بکەت و بڤی ئاوایی دێ نەچار بیت کەسێن ژ ھەژی ب دانیتە جھێن ھەژی، کەسێن پۆستان ژی وەردگرن جورئەت ناکەن گەندەلیێ بکەن.

پشتراستیێ ددەمە ھەوە ھەیا گەندەلی چارەسەر نەبیت، بزانە دێ بەردەوام خەلک توشی کریزێن دارایی و نەبوونا مووچە و خزمەتگوزاری و وەلات وێرانیێ بیت، لێ ھەر دەما گەندەلی چارەسەربوو، بزانن ئەگەر بەغدا پارەی ژی نە ھنێریت دێ رەوش ئاسایی بیت و رۆژ بۆ رۆژێ بەرەڤ پێشڤەچن، ئەڤجا ھوون ئازادن د ھەلبژاردنا ڤان بژاردان دا.