بەرھەنگاریا گەندەڵیێ ـــ تاوانا شەڕەفسزیێ​

4326 جار خوێندراوەتەوە

ھەر ل دەستپیێکی من دڤێت ئەز ئاماژێ بوێ چەندێ بدەم، کو ئەز پەیڤێت خوە ئاراستەی وان دل مریان ناکم یێت ب مال و داھاتێ ڤی مللەتی دەولەمەند بووین و وەکی نەھەنگێن ئۆقویانوسا دداعویرن و ب شەڤ و رۆژ لێ ددن و پاریێ دەڤێن ئیتیم و پەکەفتیا دڕەڤینن و دخۆن، ئەو بێ وژدانێت نابێژنە خوە، کو فەرمانبەرێ مۆچەیێ وی و زاڕۆکێت وی ٤٠٠-٥٠٠ ھزار دینار و دەمێ دھێتە بڕین و خوارن، ئەو ھەژارە چەوا دژین، چ دخۆن و چەوا ل ڤێ سڕوسەقەمێ بێ سۆتەمەنی ل وەڵاتێ دەریا سۆتەمەنیێ جان و جەستیێ خوە دپارێزن، ئەز بۆ ڤان دڕەندەیێت خایین نا ئاخڤم؟!

بڕاستی ئاخفتن یا زێدەیە بۆ کەسێن ئەگەر دندکا مرۆڤایەتیێ ھەبان، نە دکارین ڤێ دلڕەقیێ ھەتا لگەل دوژمنێن خوەژی بکن.
نەزانەک یانژی کوڵەیەک نەبت باش دزانت چاکبوونا ڤان جۆرە بێ بەختا چ ڕێ ناچنێ و ئەستەمە، چونکی ھیچ جارەکێ دیرۆکا مرۆڤاتیێ چ یا کەڤن یانژی یا نوی، ڕویدانەکا تەوبەکرنا گەندەڵچیێن زالم تۆمار نەکریە، لەورا ئەم وەسا بێ ھیڤیینە نە کو تەنھا ژ چاکسازیا وان، بەلکی ھەتا ژ چاکبوونا وان ژی، کا چەوا مرۆڤ یێ بێ ھیڤیە ل دونیایێ مریێن وان ئەڤێن ھەستیێن وان ڕزین و بووینە ئاخ ژ گوڕێن خوە دەربکەڤن و دیسان بھێن نانێ ساخان بخۆن!

گەشبینی ب چاکسازیا زاڵمێن گەندەڵکار، ھزرەکا بێ بناغەیە وەکی ھیڤی و ئومێدێن وی گەنجییە یێ دوعا کوڕەکێ چاک بۆ خوە ژ خۆدێ کری، لێ دھەمان دەمدا یێ رژدبوو ژنێ نە ھینت!! کا ئەڤ کەسە چەند بێ ئەقلە، ئەھا یێ ئومێدێن خوە دھەلاویست، کو تاڵانکەرێن ماڵێ گشتی دێ رۆژەکێ ل خوە زڤڕینەکا دروست کەن، ئانکو دێ ڕاوەستن ژ داعویرانێ و دێ وان ملیارەھا دولارێن چاپکرین و سەدەھا ملیون برمیلێن گازێ یێن دزین، ڤەگریننە ڤە و دێ بنە شەریفێت جیھانێ، ئەڤ کەسێ ئەڤە ھزرا وی بیت، پێش منڤە بای بایا ل ئەقلێ وی بکن!

ل شوونا ڤێ خەونا خاڤ و بێ ڕامان، دەمێ ل ھیڤیا چاکسازی یانژی ھەتا چاکبوونا نەھەنگێن گەندەڵیی بمینین، ئەوا ھیچ مفایەک تێدا نە، بلا ھەمی چاڤڕوھن و ھزر ڕەوشەن و خڕ دلسۆزێت ڤی وەڵاتی بەرێ خوە بدن رێکەکا دیتر یا چارەسەریێ، ئەوژی ب ئاڤاکرنا مرۆڤی کورد یان ئەگەر ھویرتر و دروستر بێژین: ب رێکا سەر ژنوی ئاڤاکرنا کەسایەتیا کەسێ کورد بکین، ئاڤاکرن و پەروەردەکرنا خوە و بەرەبابێن نھا ژ گەنج و زاڕۆکان ل سەر چەپەڵ دیتنا کریارا گەندەڵیێ، وەکو ڕەفتارەکا شەرەفسزیێ، مینا فیقھـ و فەلسەفا یاسایا عیراقی تەماشەی گەندەڵیێ کری، وەکی ھەمی دەما پیڤەرێ شەرەفێ ب دەستپاکی و دویریا ژ گەندەڵیێڤە گرێدای و ھەر ئەو کریە مەرجێ سەرەکی ژ بۆ بەشداریکرنا ژیانا گشتی و وەرگرتنا پۆستێن فەرمی و ئیداری.

ھەر تەنھا بۆ نموونە، دا پێکڤە بەرێ خوە بدین یاسا خزمەتگوزاریا سڤیل ژمارە (٢٤) یا سالا یا ساڵا١٩٦٠ێ، کا دڤی بیاڤیدا چ دبێژیت، دەقێ وی ب عەرەبی ئەڤەیە: ( لا یُعێّنُ فی الوڤائف الحکومیە الا من کان .. ٤ــ حسن الاخلاق و غیر محکوم علیە بجنایە غیر سیاسیە او بجنحە تمس الشرف کالسرقە والاختلاس والتزویر والاحتیال.. واتە: ل پۆستێن فەرمی – حکومی – کەسەک ناھێتە وەرگرتن، ئەگەر خوەدی ڕەوشتەکێ چاک نەبیت و ناھێت قەبوولکرن، ئەگەر ب تاوانەکێ یانژی ھەتا بکەفتنەکا –نە سیاسی-  یا ژ شەرەڤێ بخۆت وەکی دزی و چەپکرنا مالێ گشتی و سەختەکاری و فێلبازیێ مەحکووم بیت).

 مەرەما من پێ ئەو نینە ب یاسادانانێ دێ سەرکەفتن ل سەر گەندەڵی و مافیایێن گەندەڵگارێن کورد ب ئەنجام ھێت، نەخێر مەرەم ئەوە ئەم ل سەر ڕەتکرنا ئێکجاری یا گەندەڵیێ پەروەرەدا خوە بکین  و ڤێ تاوانێ وەکو کریارەکا بێ شەڕەفیێ ببینین، مینا بەھرا پترا جڤاکێن ئینسانی ل سەرانسەری جیھانێ دبینن و خوە و زاروکێن خوە د خێزانێدا و ل دەرڤەی خێزانێ ل سەر بھایێت پیرۆزێت پاکی و چاکی و دستپاکیێ سەر ژنوی ئاڤا بکین.

گەندەڵیێ وەکو تاوانەکا دژێ خودێ ببینن و باوەریا ئاینداری و ھێزا رۆحی فاکتەرێن ھەرە کارلێکەرن دڤێ جەنگێدا.