قەلەمفرۆش

3502 جار خوێندراوەتەوە

د بازرگانیێ دا ھەموو دەما راگەھاندن و ریکلام دشێت کەرستەی بینتە بەر فرۆتنێ و ببرسقینیت، ئەو ژی گرنگترین خالە د بازرگانیێ دا و بھایێ کەرستەی بلند دکەت، خۆ ھەکەر ئەو کەرستە یێ ب کێرنەھاتی ژی بیت، ئەڤجا نوکە دەمدەمێ بازارێ قەلەمفرۆشایە، وەکو د دەمێن سەختێن لسەر مللەتێ مە دا، ئەو جۆرە بازارە زیق دبیت، وەک بەرێ لسەر دەمێ سەدامی کو ئەو پەڕێ زۆلمێ لسەر ڤی مللەتی رۆژانە گرتن ئەشکەنجەدان و وێرانکرنا گوندان و ژبلی کۆمەلکوژیان، کو ھەر قولاچەکێ کۆمەکا کلۆخان کرینە تێدا، ئەز ھەتا سالەکا دی لسەر ڤان دەردەسەریان بنڤیسم ب داوی ناھێت، لێ یا گرنگ ئەوە لسەر وی دەمێ وێ زۆلما مەزن لسەر مللەتێ کورد، کۆمەکا قەلەمفرۆشێن کورد ھەبوون، کو ب بەژن و بالا سەدام و دەستھەلاتا وی ھەلبەست و گۆتار دارشتن، ھزر و بیر و قەلەمێ خوە بۆ پچەکا پارەی دفرۆشتن.

بەلێ یا جھێ سەرسۆرمانێ ئەڤان قەلەمفرۆشان قەت زەڕەکا وژدانێ ژی نەبوو، ئانکو ھەکەر مللەتێ وی نەبا، کافر و جووھوو بان، ما مرۆڤاتیێ ژی چ رۆل نەبوو؟ ب مخابنیڤە دێ بەرسڤ نەخێر بیت، چنکو وان ئاگەھـ ژ ئێش و ئازارێن مللەتێ خۆ نەبوون، بەلکو بەروڤاژی گەلەک جاران دژاتیا مللەتی دکرن و کوشتنا وان ب ئاسایی و ژ ھەژی ل قەلەم ددان، ب گونەھا (مخەرب)یێ ژ ھەژی کوشتن و قرکرنێ ددانە دیارکرن، ئەوا من بەحس کری بەری پتر ژ سیھـ سالانبوو.

لێ بەلێ نوکە ھەمان سەلیقە یا دووبارە دبیت، دبن دەستھەلاتەکا کوردی ب خوە دا، کۆمەکا قەلەمفرۆشان بەربوونە جانێ مللەتی و سپێدێ ھەتا ئێڤاری لسەر بەژنوبالا دەستھەلاتێ دنڤیسن و ڤی خەلکی ژی ژ ھەژی ڤێ زۆلمێ دبینن، گەر تە بەحسێ یاسایێ کر، چاڤێن خوە دگرن، گەر تە بەحسێ دیموکراسیەتێ کر، گوھێن خوە دگرن، د نڤێسینێن خوە دا دێ بینی خوە ل گوپیتکا رەوشەنبیری و مرۆڤایەتیێ دبینن، ئەوا رووددەت ل دەڤ وان ب قوپکەکێ جگارێ یە، تنێ ژێدەرێ مووچە و پاداشتێن وی یێ لسەر راستی و ھەقیێ.

زۆلما دھێتەکرن و رێژەیا گەندەلی و دزیێ گەھشتیە گوپیتکێ، بەلێ راستە ھندەک جارا ژبۆ لبەرکرنا کراسەکێ سپی ئەو ژی بەحس دکەت، بەلێ وان کەسان دەستنیشان ناکەت یێن ڤێ گەندەلی و زۆلمێ دکەن، گەر تە ئاماژە ب وی دا یێ کو وی قەلەمێ خوە فرۆتیێ دێ تە ب لایەنگرێ حزبەکێ تومەتبارکەت، یان دەستێ دەرەکی، تنێ ژبۆ کو خوە دیارکەت کەسەکێ ھشیار و رەوشەنبیر و مرۆڤدۆست، دبێژت، گەندەلیا ھەی، نەکو نینە.

بەلێ ژبەر قەلەمفرۆتنێ نەشێت راستیێ بێژیت و دڤێت وەک بکڕێ وی و ب بەژن و بالا وی بێژیت و بنڤێست.

یا ئەز دێ کەمە ئەنجام، ئەوە کو نە من گۆتیە بەلکو ھەوە ژی باش ئاگەھـ ژ دیرۆکێ ھەیە، رۆژەک دێ ھێت، ئەو پیتێن تە ژ بێ وژدانی فڕۆتین دێ بەربنە تە، بێی کو ئەڤ مللەت تشتەکی بێژت، بێی کو تە بدەنە دادگەھێ، بەلکو تنێ ئەو پیت دێ تە شەرمزارکەن و چەندین پاداشت و مووچەیێن تو ب وان پیتان وەرگرتین ھەمووییان د دفنێن تە دا ئینیت.