ڕووسیا: نابیت ئۆپەراسیۆنێن تورکیایێ مەترسیێ بۆ سەر یەک پارچەیا سوریایێ دروست بکەن
فۆتۆ: ئەرشیف
2019-01-28
847 جار خوێندراوەتەوە
سەرۆکاتیا ڕووسیایێ ڕاگەھاند، لگۆری ڕیکەفتنا ئەدەنە یا ناڤبەرا ئەنقەرە و دیمەشقێ دا، نابیت ئۆپەراسیۆنێن تورکیایێ د ناڤخوەیا سوریایێ دا ببنە ئەگەرێ دروستبوونا قەوارا ھەرێمایەتیا سەربەخۆ ل دەڤەرێن سنوری و نابیت ژی یەک پارچەیا سوریایێ بن پێ بکەت.
دیمتری پسکۆڤ پەیڤدارێ سەرۆکاتیا ڕووسیایێ ئەڤرۆ یەکشەمبیێ (٢٧ێ چلەیا ٢٠١٩ێ) ڕاگەھاند، ئۆپەراسیۆنێن سەربازیێن تورکیایێ د ناڤخوەیا سوریایێ دا، پێدڤیە ب ھووری و ڕژدی یەک پارچەیا ئاخا وی ولاتی بپارێزیت.
پسکۆڤ بەحسا وێ یەکێ ژی کر، ل سالا ١٩٩٨ێ ڕێکەفتنا ئەدەنە یا ناڤبەرا ئەنقەرە و دیمەشقێ ھاتیە ئیمزاکرن، کو ئەو مافە ب تورکیایێ دایە ئۆپەراسیۆنێن سەربازی یێن بچیک لسەر سنورێن سوریایێ ل دژی "تیرۆرستا" ب تایبەت ئەوێن چالاکی د دەڤەرێ دا ھەین پێکبینیت.
دیارکر ژی، ئەرکێ وان یێ سەرەکی دێ ئەو بیت کو نابیت ب چ ئاوایەکێ ئۆپەراسیۆنێن تورکیایێ ببن ئەگەرێ پارڤەبوونا قەوارێن ھەرێمایەتیا سەربەخۆ ل دەڤەرێن سنوری، ھەروەسا نابیت ببیتە گەف لسەر سەلامەتیا ھەرێمایەتی و سیاسیا سوریایێ.
ئەو داخۆیانیێن سەرۆکاتیا ڕووسیا دەمەکێ دایە، ڕەجەب تەیب ئەردۆغان سەرۆکێ تورکیایێ دخوازیت ڕیکەفتنا ئەدەنە یا سالا ١٩٩٨ێ یا ناڤبەرا ئەنقەرە و دیمەشقێ بکەتە ھێجەت بۆ دەستێڤەدانێن ھێزێن ولاتێ خوە د ناڤخوەیا سوریایێ دا و پێدڤیە ئەو ڕیکەفتنە گۆتۆبێژ لسەر بھێنە کرن و ڕووسیا دخوازیت ب بیرا ئەردۆانی بینیت، کو ھەموو پێنگاڤێن وان د سوریایێ دا دڤێت ھەڤپاری دگەل حکومەتا شەرعی یا وی ولاتی بیت.
س.م