فۆتۆ:
2019-01-22
722 جار خوێندراوەتەوە
سەرۆکێ سازیا بلندا هەلبژارتنێن تورکیایێ راگەهاند، ٥٧ ملیۆن و ٩٣ هەزار و ٩٨٥ کەس دکارن بەشداریێ د هەلبژارتنێن شارەداریان دا بکەن.
سەعدی گوڤەن سەرۆکێ سازیا بلندا هەلبژارتنێن تورکیایێ دیار کر، زەحمەتە کەسەک خەلکێ تورکیایێ نەبە و بکارە بەشداریێ د هەلبژارتنان دا بکە. د تۆمارا دەنگدەران دا ژی ناڤێ شەش هەزار کەسێن کو تەمەنێ وان ل ژۆر ١٠٠ سالیێ یە هاتیە تۆمارکرن و ناڤێن کەسێن مری ژی د تۆمارێ دا هاتیە رەشکرن.
هەروەسا دازانین ئامادەکاریێن دەستپێکی بۆ هەلبژارتنێن ٣١ێ ئادارێ هاتنە تەمامکرن.
هەلبژارتنێن شارەداری و موختاران، کو وەکی هەلبژارتنێن هەرێمێ ژی تێن بناڤکرن، بریارە د ٣١ێ ئادارا ٢٠١٩ان دە بێنە کرن.
هەلبژارتنێن شارەداری و موختاران، دێ جارەکی دن هەڤکێشەێن ناڤخوەیی یێن تورکیا و باکورێ کوردستانێ بگۆهەرینە و ب تایبەتی ڤێ جارێ هەڤرکیەکا گەلەک مەزن د ناڤبەرا هەدەپێ و ئاکەپێ دا تێ دیتن.
چ قاس ژی زەخت و فشارێن حکومەتێ لهەمبەر شارەداری و سازیێن کوردان ل باکورێ کوردستانێ، بەردەوام بوون، لێ پشتی هێرشا داعشێ، بۆ سەر کۆبانێ د مەها یەک " چلەیا" سالا ٢٠١٤ێ دە و شەرێ ناڤ باژارێن باکورێ کوردستانێ د سالێن ٢٠١٥ و ٢٠١٦ان دە، ب بڕیارەکا تایبەت، دەست ب گرتنا شارەدارێن کورد و دانانا کارمەندێن حکومی " قەیومان" لشوونا شارەدارێن کورد هاتە کرن.
کورد د سالا ٢٠١٤ان دە ب رێیا پارتیا هەرێمان یا دەمۆکراتیک "دەبەپێ" تەڤلی هەلبژارتنێن هەرێمی بوون.
دەبەپێ کاری د هەلبژارتنان دە ١٠٢ شارەداریان بدەست بخن کو د ناڤا وان دە ١١ شارەداریێن ناڤەندا باژاران هەبوون.
پارتیا هەرێمان یا دەمۆکراتیک "دەبەپێ"، شارەداریێن "دێرسم، ئامەد، مێردین، باتمان، جۆلەمێرگ، ئاگری، ئیدر، وان، شرنەخ و سێرتێ" و ٩١ ناڤچەیێن دن یێن باکورێ کوردستانێ بدەست خست و سیستەما هەڤسەرۆکیێ کو ژ وان رە "هەڤشارەدار" دهات گۆتن، د شارەداریان دا هاتە بجهکرن.
چ قاس زەخت و فشار ل سەر شارەداریان بەردەوام بوون، لێ پشتی داربەیا ١٥ێ تیرمەها ٢٠١٦ان دە، فشارێن حکومەتێ ئاستەکا پیڤانەیی تۆمار کر. د دەمەکێ کێم دا قەیوم هاتن ئامادەکرن و شارەدارێن کورد ژی هاتن گرتن.
وێ دەمێ د کۆنفرانسەکا چاپەمەنیێ دە، بەرپرسێن پارتیا هەرێمان یا دەمۆکراتیک، دانزانین، لشوونا ٩٤ شارەدارێن وان، قەیوم "کارمەندێن حکومی" هاتنە دانین و ٦٨ شارەدار ژی هەیا نها د گرتیگەهان دانە.
لگۆری ئامارێن دەبەپێ، زێدەتر ژ دوو هەزار کارمەند و خەباتکارێن ئالیگرێن دەبەپێ، بێکار مان و بوو سەدەما بێکاریەکا زێدە د ناڤا باژارێن باکورێ کوردستانێ دە.
هـ.ج