حکومەتا تورکیا، نێزیکی ٨٠ هەزار سەرباز ل سەر سنورێ رۆژئاڤا بەلاڤ کرنە
فۆتۆ:
2019-01-16
736 جار خوێندراوەتەوە
حکومەتا تورکیا، ب ئارمانجا پێکئانینا ئۆپەراسیۆنێ ل هەمبەر هێزێن کورد، نێزیکی ٨٠ هەزار سەرباز ل سەر سنورێ رۆژئاڤایێ کوردستانێ بەلاڤ کرنە.
مالپەرا ئەن سۆن هابەرا گرێدایی پارتیا داد و گەشەپێدان "ئاکەپێ" راگەهاند، لڤ و تەڤگەرێن سەربازی یێن ئارتێشا تورکیا بەردەوامن و ڤێ جارێ ژی ئارتێشێ کۆماندۆیێن هێزا دەریایی ناسکری ب "سات" دەرباسی دەردۆرێ باژارۆکێ منبجێ کرن.
هەروەسا دازانین، ڤەگوهاستنا سەرباز و تانک و تۆپ و ئالاڤێن لەشکەری بۆ سەر سنورێ رۆژئاڤایێ کوردستانێ بەردەوامە و هەیا نها ژ بلی ب هەزاران تانک و تۆپ و چەکێن گران، نێزیکی ٨٠ هەزار سەرباز ل سەر سنور هاتنە بجیکرن.
ئەڤ یەک ژی د دەمەکی دایە کو دۆناڵد ترەمپ سەرۆکێ ئەمریکایێ راگەهاندبوو، ئەگەر تورکیا هێرشێ کوردان بکە، دێ ئابۆریا وی وەلاتی وێران بکە.
پشتی وێ یەکێ رەجەب تەییب ئەردۆغان سەرۆک کۆمارێ تورکیا ب رێکا تەلەفۆنێ د گەل ترەمپ ئاخڤی و ئەردۆغان دابووزانین، د پەیوەندیا تەلەفۆنی دا، بەحسا ئاڤاکرنا هەرێمەکا ئارام ب درێژاهیا ٣٠ کیلۆمەتران د ناڤ ئاخا سوریایێ هاتیە کرن.
هـ.ج