بەرپرسەکێ ئەمریکایێ: ئێدی واشنتن بزاڤان بۆ لادنا بەشار ئەسەد نادەت
فۆتۆ: فۆتۆ: ئەرشیف
2018-12-18
748 جار خوێندراوەتەوە
جەیمز جێفری نوینەرێ تایبەتێ وەزارەتا دەرڤەیا ئەمریکایێ بۆ کاروبارێن سوریایێ ڕاگەھاند، ئێدی واشنتن بزاڤان بۆ لادانا بەشار ئەسەد سەرۆکێ سوریایێ د دەستھەلاتێ دا نادەت.
د دەما گۆتارەکێ دا ل "جڤاتا ئەتلانتیک"یا واشنتنێ، جەیمز جێفری ڕاگەھاند، "ئەم دخوازین حکومەتەکێ د سوریایێ دا ببینین کو د بنگەھین دا یا جۆدا بیت، ئەڤ یەک ژی نەخشە ڕێیەک بۆ گۆھەرتنا حکومەتێ نینە د وی ولاتی دا و ناخوازین ژ دەستێ ئەسەدی ڕزگار ببین".
ناڤبری دازانین ژی، ئیدارەیا واشنتنێ دێ ل سەر دژایەتیکرنا ئالیکاریێن ماددیێن ولاتان بۆ نۆیژەنکرن و ئاڤاکرنا سوریایێ بەردەوام بیت، ھەیا کو ئەو ولات نێرین و کریارێن خوە دگۆھرینە.
ئەو یەک ژی دیارکریە، ئاڤاکرن و نویژەنکرنا سوریایێ د نھا دا پێدڤی ب ٣٠٠ بۆ ٤٠٠ ملیار دۆلارانە.
نوینەرێ تایبەتێ وەزیرێ دەرڤەیێ ئەمریکا بۆ کاروبارێن سوریایێ ڕاگەھاند ژی، زێدەباری سەرکەفتنێن حکومەتا سوریا و ھەڤپەیمانێن وێ، ھەیا نھا شەرێ ناڤخوەیا سوریایێ ب داویی نەھاتیە و ھەری کێم ١٠٠ ھزار چەکدارێن نەیارێن دەستھەلاتێ د وی ولاتی دا ھەنە.
ئەڤە جارا یەکەمینە بەرپرسەکێ پلە بلندێ ئەمریکایێ ب ئاشکرا بەحسا دژایەتی نەکرنا وی ولاتی بۆ مانەڤا بەشار ئەسەدێ سەرۆکێ سوریایێ د دەستھەلاتێ دا دکەت.
د سەردەمێ باراک ئۆباما سەرۆکێ بەرێ یێ ویلایەتێن ھەڤگرتیێن ئەمریکایێ، ئیدارەیا ئەمریکایێ ب ئاشکرا داخوازا لادانا بەشار ئەسەدی د دەستھەلاتێ دا دکر، ھەر چەند ئۆباما دژی دەستڤەدانا ڕاستەوخۆ یا سەربازی د سوریایێ دا بوو.
س.م