فۆتۆ: ئەرشیڤ
2019-05-17
1009 جار خوێندراوەتەوە
ڕۆژنامەیا گاردیان یا بەریتانی ژ زارێ چاڤکانیێن ئیستیخباراتی ڤە بەلاڤکریە، بەریا سێ حەفتیان قاسم سلێمانی فەرماندارێ فەیلەقا قودس یا سەر ب ئارتێشا پاسدارێن ئیرانێ، دگەل "گروپێن چەکدارێن نیزیک ژ ئیرانێ" جڤیایە و داخواز ژێکریە، د بەرهەڤیێ دابن بۆ "شەڕێ ب وەکالەت".
لگۆڕی نووچەیا ڕۆژنامەیێ، کو ژ چاڤکانیەکێ ئیستیخبارتی یێ بلند بدەست کەفتیە، د جڤینا ناڤبەرا قاسم سلێمانی و گروپێن چەکدارێن عێراقێ دا، هەموو سەرکردەیێن هیزێن سەر ب حەشدا شەعبی بەرهەڤبوونە.
دیارکریە ژی، "زێدەباری وێ یەکێ کو د دەما پێنج سالێن دەربازبوویی دا سلێمانی بەردەوام جڤین دگەل گروپێن چەکدارێن شیعەیێن عێراقێ ئەنجام دانە، لێ داخویانیێن وی یێن ڤێجارێ جودابوونە، کو هەرچەندە گازیا ڕاستەڕاست نەبوویە بۆ شەڕی، لێ نێزیکی وی بابەتی بوویە".
د دەما دوو حەفتیێن دەربازبوویی دا داخویانیێن ئەمریکا و ئیرانێ ئالۆزیێن زێدەتر بدیف خۆدا ئینانە، ب تایبەت دەما ئیرانێ ژ ئەگەرا ڕێک نەدان ب فرۆتنا نەفتا ولاتێ خۆ گەفا داخستنا گەریا هورمز کر، د هەمبەر دا ژی ویلایەتێن هەڤگرتیێن ئەمریکا هێز و کەشتیێن شەڕی یێن زێدەتر بۆ دەڤەرێن کەنداڤێ شاندن و ئاستێ هێزێن خۆ د ناڤخۆیا عێراق و سوریایێ بلندتر کر.
س.م