یەک ژ دیمەنێن بوویەرێن ژ ئەنجاما لەهیێ دروستبووین
فۆتۆ: میهری نیۆز
2019-03-25
990 جار خوێندراوەتەوە
ڕێڤەبەریا نوژداریا داد یا پارێزگەها شیرازا ئیرانێ ڕاگەهاند، هەژمارا وان کەسێن کو بسەدەما لەهیا ئەڤرۆ یا پارێزگەهێن شیراز و فارسا باشورێ ئیرانێ خەندقینە بۆ ١٧ کەسان بلندبوویە و ٧٤ کەسێن دی ژی برینداربوونە.
بیر حسێن گولیوەند سەرۆکێ ڕێکخراوا حالەتێن ژنشکڤە یا ئیرانێ ڕاگەهاند، لگۆری وان داتا و ڕاپۆرتێن نوژداریا داد گەهشتیە دەست وان، هێشتا ژبەر خرابیا ساخلەمیا وان ٢٠ بریندار د نەخۆشخانەیێ دا هێلانە، بۆ وەرگرتنا چارەسەریا پێدڤی.
بۆ لهەوارچوونا ڕەوشێ ژی حەسەن ڕۆحانی سەرۆک کۆمارێ ئیرانی فەرمان ب تەڤایا پارێزگار و ڕێڤەبەریێن فەرمانگەهێن خزمەتگوزاری کر لسەر کارێن خۆ بمینن هەیا داویا جەژنا نەورۆزێ، ژبۆ کو بکارن دگەل دەزگەهێن ئەولەهیێ و پەیوەندیدار دا هەڤبەندیێ بکەن، بۆ ڕووبڕووبوونا مەترسیێن دروستبوونا لەهی و چارەسەرکرنا وان ئاریشەیان کو ئەگەرا وێ یەکێ هەیە لەهیێ دگەل خۆدا بینیت.
ژ ئالیەکێ دی ڤە حسێن دەروێشی سەرۆکێ کۆمەلگەها هەیڤا سور یا ئیرانێ ل پارێزگەها فارس ڕاگەهاند، تیمێن هەوارهاتنێ ل پارێزگەها شیرازێ کارینە سەرنشینێن زێدەتری ١٠٠ تڕۆمبێلان ڕزگار بکەن، کو ژبەر لەهی د ناڤ تڕۆمبێلێن خۆدا ئاسێ مابوون.
ئەڤرۆ دووشەمبیێ (٢٥ێ ئادارا ٢٠١٩ێ) ژبەر وێ پێلا بارانبارینا بەشەکا پارێزگەهێن ئیرانی ڤەگرتی، لەهی د چەند پارێزگەهێن ئیرانێ دا دروستبوو و ب سەدان تڕۆمبێل دگەل خۆدا برنە و زارەکا زێدە یا جانی و مادی ب دەڤەران گەهاندیە.
س.م