ڕەوانگەھا سوری: مالباتێن چەکدارێن داعشێ ل ھەمبەر ھزاران دۆلاران ب قاچاغ بۆ تورکیایێ دھێنە ڤەگوھاستن
فۆتۆ: ئەرشیڤ
2019-02-24
772 جار خوێندراوەتەوە
ڕەوانگەھا مافێن مرۆڤی یا سوری ژ زارێ چەند چاڤکانیێن باوەرپێکری بەلاڤکر، ب دەھان مالباتێن چەکدارێن داعشێ کارینە ژ دەڤەرێن دۆرپێچکری یێن ڕۆژھەلاتا ڕوبارێ فوراتێ خۆ بگەھینە تورکیایێ و ڕزگار ببن لھەمبەر کوژمەکێ زێدە یێ پارەی.
ڕێکخراوێ دیارکریە ژی، زێدەتر ژ ٨٥ مالباتێن چەکدارێن داعشێ کارینە ب ڕێکا قاچاغ ل دەڤەرێن بن کۆنترۆلا ھێزێن سوریایا دیموکرات خۆ بگەھینە ناڤخۆیا تورکیایێ.
ھەروەسا زەلالکریە، ھەریەک ژ وان مالباتان ل ھەمبەر ڤەگۆھاستنا ھەر کەسەکێ ژ ئەندامێن خۆ کوژمێ ١٠ تا ٥٠ ھزار دۆلاران دانە.
ھەروەسا د ڕاپۆرتێ دا ھاتیە، یەک ژ وان مالباتان کو ژ چەکدارەکێ داعش و ھەڤژین و ٤ زارۆکێن وی پێکدھاتن، کوژمێ ٥٠ ھزار دۆلاران دانە، ژبۆی کو ژ دەڤەرێن دۆرپێچ و شەڕ یێن ڕۆژھەلاتا فوراتێ خۆ گەھاندنە سنورێ تورکیایێ و ڕزگار بوونە.
ئەڤە ژی دەمەکێ دایە، د دەما دوو مەھێن دەرباسبووی دا کڤانا دۆرپێچێن سەر ڕێکخراوا داعشێ ل دەڤەرێن ڕۆژھەلاتا فوراتێ تەسکتر بوونە، چ دەرفەتێن ڕزگاربوونێ بۆ نەمانە، ب تایبەت د دەما چەند حەفتیێن بووری دا، کو ھەژمارەکا زێدە یا چەکدارێن وێ ڕێکخراوێ خۆ ڕادەستی ھێزێن سوریایا دیموکرات کرن.
د نھا دا ژی شەڕ د دەڤەرەکا بچیک یا ڕۆژھەلاتێ فوراتێ دا ھەیە، کو دبیت سەرکردێن پلە بلندێن داعشێ تێدابن.
س.م