فۆتۆ:
2020-09-14
625 جار خوێندراوەتەوە
د ئەنجاما لێکۆلینەکێ دا کو دەربارێ ئەنجاما پێکئینانا هەڤژینیێ د گەل خزمان دا هاتیە کرن دەرکەت، پرانیا دایک و بابێن کو زارۆکێن وان نەخوەشن، پسمام و دۆتمام یان کچا خاڵ و کورێ خالێ هەڤدوو نە و ل پرانیا وەلاتان ژی ئاستەنگکرنا هەڤژینیا ناڤبەرا خزمان بوویە چاند و کلتورەک.
د بەرنامەیا ڤێ جارێ یا "هێلا سور" یا کەنالا ئێن ئاڕ تی دا کو ژ ئالیێ رۆژنامەڤان ژوان قەرەداغی ڤە تێ پێشکێشکرن، بەحسا پێکئانینا هەڤژینیێ د ناڤبەرا خزمان دا و باندۆرا وێ پرۆسەیێ ل سەر تەندروستیا زارۆکان هاتیە کرن.
د لێکۆلینێن زانستی دا، تێ گۆتن، هەڤژینیا ناڤبەرا خزمان، سەدەما دەرکەتنا زێدەتر ژ ٨٢ جۆرێن نەخوەشیێ نە کو بەشەک ژ نەخوەشیان دبن سەدەمێن نەخوەشیێن دەمدرێژ د ناڤ مالباتێ دا.
نەخوەشیێن دەمدرێژ ب سەدەما تەڤلیهەڤبوونا بۆهێلان و نەگونجانا فاکتەرێن وان کو تایبەتمەندیێن کەسایەتیان د "دی ئێن ئەی" دا دەردکەڤن و نەتەمامی د رێزبەندیا جینێن مرۆڤان دا چێدبن.
یەک ژ دیارترین نەخوەشیێن دەمدرێژ ژی نەخوەشیا خوینێ یە، ب تایبەت تالاسیمیا یە کو نها ل هەرێمێ وەکی نەخوەشیەکا بەرجاڤ تێ دیتن. هەروەسا دبن سەدەما نەخوەشیێن کۆئەنداما دەمار، وەکو ئیفلجیا مێژی و کۆئەنداما هەرس و دل و نەخۆشیێن زکماکی یێن گورچیسک و دل و چەند نەخوەشیێن دن.
دەربارێ پێکئانینا پرۆسەیا هەڤژینیێ د ناڤبەتا خزمان دا ژ هێلا پزیشکی ڤە خالس قادر پەیڤدارێ وەزارەتا تەندروستیێ دازانین، پێدڤیە مرۆڤ خوە ژ پێکئانینا پرۆسەیا هەڤژینیێ د گەل خزمان، ب تایبەتی خزمێن نێزیک بپارێزە. ژبەر کو ئەگەرا نەخوەشیێن زکماکی د زارۆکان دا زێدە دکە.
ئەحمەد قامیشی مامۆستایێ ئۆلی ژی ژ هێلا ئۆلی ڤە پێکئینانا پرۆسەیا هەڤژینیێ د ناڤبەرا خزمان دا شرۆڤە کر و دازانین، هەڤژینی د ناڤبەرا خزمان دا حەرام نینە و ئۆلا ئیسلامێ رێ ل بەر وێ یەکێ ناگرە، ژ بەر کو پێغەمبەر "س.خ" ب خوە ئەو یەک کریە و کچا خوە دایە ئیمامێ عەلی کو پسمامێ وی بوو. د ئیسالامێ دا نە رێ لێهاتیە گرتن و نە ژی فەرمان پێ هاتیە کرن. ژ بەر وێ یەکێ مرۆڤ دکارە بکە و نەکە ژی، واتە هەلبژارتن د دەستێ مرۆڤ دایە.