فۆتۆ:
2021-05-22
290 جار خوێندراوەتەوە
پەیڤدارێ وەزارەتا دەرڤەیا ئەمریکا ڕاگەهاندن وەزیرێ دەرڤە یێ وی وەلاتی، ل رۆژێن داهاتیدا دێ سەرەدانا رۆژهەلاتا ناڤەراست کەت، ئەو ژی ل پشتی وێ یەکێ دهێت ئاگربەستا دناڤبەرا ئیسرائیل و گروپێن سەربازیێن کەرتێ غەززە ئێخستنە بیاڤێ جێبەجێکرنێ.
د کۆنفرانسەکێ رۆژنامەڤانیدا، نێد پرایس پەیڤدارێ وەزارەتا دەرڤە یا ئەمریکا ئاماژە ب وێ یەکێ کر، ئەنتۆنی بلینکن وەزیرێ دەرڤە یێ وی وەلاتی برێیا پەیوەندیەکا تێلەفونی ئاخفتن دگەل گابی ئاشکیناز، هاوتا یێ ئیسرائیلی کریە.
ڕاگەهاند ژی، د پەیوەندیێ دا وەزیرێ دەرڤە یێ ئیسرائیلێ پێشوازی ل گەشتا بلینکن بۆ ناڤچەیێ کریە.
پەیڤدارێ وەزارەتا دەرڤە یا ئەمریکا بەحس ژ وێ یەکێ ژی کریە، "د چارچوڤی سەرەدانێ دا ئەنتۆنی بلینکن چاڤێ وی ب وەزیرێن دەرڤەی ئیسرائیل و فەلەستین و وەزیرێن دەرڤەی وەلاتێن دی یێن ناڤچەیێ دکەڤیت، ئەو ژی ب مەبەستا گوتوبێژ لسەر بزاڤێن چارەسەربوونێ و کارکرن پێکڤە بۆ بنیادنانا داهاتیەکێ باشتر بۆ ئیسرائیلیان و فەلەستینیان."
هەڤدەم، نێد پرایس دەربارەی دەما گەشتا وەزیرێ دەرڤە یێ ئەمریکا بۆ ناڤچەیێ چ زانیاری بەرچاڤنەکرن.
پشتی ١١ رۆژا ژ شەر و ئالوزیێن دناڤبەرا ئیسرائیل و فەلەستین و پشتی چەندین بزاڤێن هەرێمی و ناڤدەولەتی بۆ ناڤەندگیری و گرێدانا ئاگربەستێ گرتنە بەر، هەڤدەم، پشتی کو ئامارا ژیان ژدەستدانا وەلاتیێن فەلەستینێ بۆ ٢٣٢ یان بلندبووی و زێدەتر ژ هزار و ٩٠٠ کەسان ژی ژ سەدەما بۆردومانێ برینداربوون، د بەرامبەر دا ١٢ ئیسرائیلیان ژی ژیانا خۆ ژ دەستدایە و ٣٠٠ ێن دی ژی برینداربوون، شەڤا ٢٠ێ ڤێ مەهێ، جڤاتا ئاسایشا ئیسرائیلێ ئاگربەست دگەل فەلەستینێ دەربری و گروپێن چەکداریێن حەماس ژی رازیبوونا خۆ بۆ ئاگربەستێ دەربری.
هـ.ر