فۆتۆ:
2021-05-15
518 جار خوێندراوەتەوە
ئاژانسا نووچەیی یا فرانس پرێس بەلاڤکر، بسەدەمێ هێرشا ئەسمانی یا بالەفڕێن ئیسرائیلێ ئاڤاهیێ رۆژنامەڤانی یێ بیانیان ل کەرتێ غەززە هاتە هەرفاندن.
ئاژانسا فرانس پرێس ئەشکەراکر، ژ ئەنجامێ هێرشێن ئەسمانی یێن ئیسرائیلێ ئاڤاهیەکێ ١١ نهومی هەرفی، کو نڤێسینگەهێن هەر ئێک ژ رۆژنامەڤانێن تەلەفزیۆنا جەزیرە یا قەتەری و بنگەهێ ئەسۆشییەیتد پرێس یا ئەمریکییە ل کەرتێ غەززە دناڤدابوون.
ناڤێ وی ئاڤاهی 'جەلا تاوەر' بوو و دکەڤیتە کەرتێ غەززە و نڤیسینگەهێن رۆژنامەڤانێن جەزیرە و کەنالێن ناڤدەولەتیێن دی تێدابوون و روومالا بەردەواما ئالوزیێن دناڤبەرا ئیسرائیل و فەلەستینێ دا دکر.
دەربارەی هەرفاندنا 'جەلا تاوەر' ژی، جەواد مەهدی خۆدانێ ئاڤاهی بۆ ئاژانسا فرانس پرێس گوتیە، بەری روویدانێ ئەفسەرەکێ دەزگەهێ هەوالگێریێ ئەم ئاگەهدارکرین کو ب تنێ دەمژمێرەک لبەردەستە بۆ چولکرنا تەڤاهیا وی ئاڤاهی.
ئالوزیێن ئەڤ جارە یێن دناڤبەرا ئیسرائیل و فەلەستینێ بۆ دەمێ چەند رۆژانە لسەر چەند خانیەکێن تاخێ شێخ جەڕاح دەستپێکرینە ل گورەی ئاماران ژی، هەیا نها ١٤٠ فەلەستینی بسەدەمێ هێرشێن ئیسرائیلێ ژیانا خۆ ژ دەستداینە و نێزیکی ٩٥٠ کەسان ژی بریندارن.