فۆتۆ:
2021-04-17
452 جار خوێندراوەتەوە
پەیڤدارێ حکومەتا ئەلمانیا ڕاگەهاند، شێوەرمەندا وەلاتێ وان ڤاکسینا ئیسترازینیکا یا بەریتانی- سویدی وەرگرت، هەڤدەم، وەزیرێ دەرڤەیێ وی وەلاتی داخازکر ئازادیا تەمام بهێتەدان ب وەلاتیان دەربارەی وەرگرتنا ڤاکسینا دژی کۆرۆنایێ.
ئەڤرۆ شەمبی، شتیڤن زایبرت پەیڤدارێ حکومەتا ئەلمانیا ل تویتەرێ خۆ دیارکر، ئەنگێلا مێرکل شێوەرمەندا وی وەلاتی، رۆژا ئەینی قورچا ئێکی یا ڤاکسینێ ئیسترازینیکا وەرگرت.
دبێژیت، ئەنگێلا مێرکل خۆشحالیا خۆ دەربڕیە کو ئێکەم قورچا ڤاکسینێ ئیسترازینیکا بەریتانی- سویدی وەرگرتیە.
هەڤدەم، وەرگرتنا ڤاکسینێ ب کلیلا سەرکەفتنێ بسەر کۆرۆنایێ وەسف کر.
ل ١٢ی ڤێ مەهێ رۆژناما بێلدی یا ئەلمانی بەلاڤکریە، شێوەرمەندا وی وەلاتی ل ناڤەندا وەرگرتنا ڤاکسینێ دژی کۆرۆنایێ ل دەڤەرا تەمبلهۆڤ ناڤێ خۆ تومارکربوو بۆ وەرگرتنا ڤاکسینێ، لێ هەلوەشاند.
لگورەی وێ رۆژنامێ، ئەنگێلا مێرکل شێوەرمەندا ئەلمانیا بسەدەما ئامادەبوونا وێ ل جڤینەکا گرتی یا فراکسیۆنا یەکێتی دیموکراتی مەسیحی و یەکێتی یا جڤینا مەسیحی نەشیایە ئامادەی وەرگرتنا ڤاکسینێ بیت.
هەڤدەم، لگورەی میدیایێن ئەلمانیا ناڤەندا دابەشکرنا ڤاکسینێ دژی کۆرۆنایێ ل دەڤەرا تەمبلهۆڤ ڤاکسینا جۆرێ ئیسترازینیکا بەریتانی- سویدی بکاردئینن.
ئەڤە ددەمەکیدایە، بەریا نها ئاژانسا دەرمانێن ئەوروپا یا سەر ب یەکێتیا ئەوروپا ڤە ڕاگەهاند، ئەگەرێ هەبوونا پەیوەندیێ هەیە دناڤبەرا وەرگرتنا ڤاکسینا ئیسترازینیکا و مەینا خۆینێ د لەشێ وەرگریدا کو پشتی وێیەکێ دبیتە سەدما راوەستانا مێشکی و توشبوون ب جەلتەیا مێشکی، لێ ئێکلا نەبوویە.