.jpg)
فۆتۆ:
2021-04-02
486 جار خوێندراوەتەوە
جڤینا وەلاتێن ٥+١ کو ئەڤرۆ ب ئاوایێ ئۆنلاین برێڤەچوو، ب مەبەستا شرۆڤەکرنا لهەڤهاتنا ئەتۆمی یا ئێرانێ بێی ئەنجام بداوی هات.
هەر یەک ژ وەلاتێن چین، فرەنسا، ئەلمانیا، روسیا، بریتانیا، و ئێران ب ئاوایێ ئونلاین جڤینەک ئەنجامدا، ب مەبەستا کاراکرنا لهەڤهاتنا ئەتومی برێکا پێگیریێن ئێرانێ ب لهەڤهاتنێ و هەلوەشاندنا سزایێن ئەمریکا لسەر ئێرانێ، لێ ئەو جڤین بێی ئەنجام بداوی هات.
هەڤدەم، ل گورەی میدیایێن ئێرانێ، د جڤینێدا عەباس عێراقچی جهگرێ وەزیرێ دەرڤەیێ ئێرانێ ب وەلاتێن ئەندام ڕاگەهاندیە، تاران ئامادەنینە بەری کو ئەمریکا سزایێن لسەر وان هەلبگریت چالاکیێن ئەتومی کێمبکەت.
بەحس ژ وێ یەکێ ژی کریە، بزاڤین وان دێ بەردەوام بن بۆ ڤەگەریانا ئێرانێ بۆ ناڤ لهەڤهاتنێ، بۆ وێ مەبەستێ ژی بریارە ل حەفتیا داهاتی ل ڤیەنا جڤینەکا دی بهێتەکرن دەربارەی وێ یەکێ.
ژ ئالیێ خۆ، بەری جڤینێ وەزارەتا دەرڤەیا ئەمریکا پێشوازی ل جڤینێ کر و ئامادەیا واشنتن نیشاندا بۆ گرتنەبەرا پێنگاڤا هەمان ئاوا بۆ ڤەگەریانا بۆ لهەڤهاتنێ.
رۆژا ٢٠ێ مەها ئێک یا ئەڤسالە، جۆ بایدن وەک ٤٦ ـەمین سەرۆکێ ئەمریکا سیندا یاسایی خار، هەڤدەم، ل گورەی ئاخفتنێن بایدن ل دەما بانگەشا هەلبژارتنادا، ب نیازە پەیوەندیێن دگەل ئێرانێ ئاسایی بکەت و لهەڤهاتنا ئەتومی سالا ٢٠١٥ێ ژی، کو ل ٢٠١٨ێ دا ئیدارا ترەمپ ب فەرمی خۆ لهەڤهاتنێ ڤەکێشا و سەر ژ نوی زیندی بکەت.
لهەڤهاتنا JCPA کو ب لهەڤهاتنا ئەتومی بەرنیاسە و ل ١٤ی تیرمەها ٢٠١٥ێ، ل ڤییەننا یا پایتەختێ نەمسا دناڤبەرا هەر یەک ژ چین، فرەنسا، روسیا، بریتانیا، ئەمریکا، ئەلمانیا ژ ئالیەکێ و ئێران ژی ژ ئالیەکێ دی ئیمزاکر، ئارمانج ژ لهەڤهاتنێ ژی سنوردارکرنا چالاکیێن ئەتۆمیێن بەرهەمئینانا چەکێ ئەتۆم بوو ژ ئالیێ ئێرانێ ڤە.
هـ.ر