فۆتۆ:
2021-02-09
560 جار خوێندراوەتەوە
دگەل نێزیکبوون ژ داویهاتنا وەرزێ زڤستانێ و بلندبوونا پلەیێن گەرمێ ل ئێرانێ، داخازی ل سەر بکارئینانا غاز و کارەبێ کێمدبیت و ئاستێ شاندنا غازێ بۆ دەرڤە زێدە دکەت.
وەزارەتا کارەبا عێراقێ ڕاگەهاند، ئێران رێژا شاندنا غازێ بۆ عێراقێ زێدەکریە، ئەو زێدەکرن ژی ب ئاوایەکێ ئەرێنی کاریگەری لسەر زێدەبوونا دانا دەمژمێرێن کارەبێ بۆ وەلاتیان دێ هەبیت.
ئەحمەد عەبادی، پەیفدارێ وەزارەتا کارەبا عێراقێ د داخویانیەکێ دا بۆ رۆژناما سەباح ڕاگەهاندیە، ئێرانێ ئاستێ شاندنا غازێ بۆ عێراقێ زێدەکریە، ب ئاوایەکێ بۆ هەر رۆژەکێ ب رێژا ١٣ ملیون پێ چارگوشەیە، کو ل چەند رۆژێن دەربازبوویدا حەفت ملیون پێن چارگوشە بوو.
کێمبوونا هنارتنا غازا تارانێ بۆ بەغدا د دەما دەربازبوویدا بۆ چەند ئەگەرا ڤەگەڕیا، ژ وان:
ئێکەم- رێژا وان قەرێن ئێرانێ کو ژ ئالیێ عێراقێ نە
دووەم- ئاریشا تەکنیکی ژ ئالیی عێراقێ
سێیەم- زێدەبوونا داخازیا ئێرانێ لسەر غازێ ژ ئەگەرێ هاتنا وەرزێ زڤستانێ.
هەروەسا وەزارەتا کارەبا عێراقێ دبێژیت، لدیڤ گرێبەستان بڕیار بوو ئیران رۆژانە ٥٠ ملیون پێ چارگوشە غاز بۆ عێراقێ بهنێریت، لێ ئەو رێژە بۆ حەفت ملیونا هاتە کێمکرن، ئەوێ ژی کاریگەری هەبوو لسەر ژدەستدانا نیزیکێ شەش هزار مێگاواتێن کارەبێ ل وان کیلگەهێن پێتڤی ب غازێ هەی.
بەحس ل وێ یەکێ ژی کر، ئەو شەش ملیون لیترێن زێدەکری، ژ ئێرانێ دهنێریت بۆ ناڤچەیێن باشورێ عێراقێ، ژ وێرێ ژی ل بنگەهان ڤەدگوهێزیت بۆ ناڤچەیێن ناڤەراست، ئەو ژی بو پشتراستبوونێ ژ وان بنگەهێن پێتڤی ب غازێ هەى.
ل سالا ٢٠١٨ی ل پشتی ڤەکێشانا ئەمریکا ژ لهەهاتن ئەتۆمی ل سەردەمێ ئیدارا بەرێ یا ئەمریکا، واشنتۆن سزایێن سەر ئیرانێ چرکرینە، لێ د دەما دەربازبوویدا چەندین جارا دەما فرۆشتنا غازا ئێرانێ ب عێراقێ درێژکریە، داوی جار ژی ل مەها مژدارا دوویێ سالا دەربازبوویدا بوو.