فۆتۆ:
2021-06-26
247 جار خوێندراوەتەوە
وەزارەتا ساخلەمیا عێراقێ ڕاگەهاند، شەپۆلا سێ یا کۆرۆنایێ گەهشتیە عێراقێ و زێدەکرنا رێکارێن خۆپارێزیێ و بلەزکرنا هەوا دانانا ڤاکسینێ دێ گرنە بەر.
سەیف بەدر پەیڤدارێ وەزارەتا ساخلەمیا عێراقێ د ڕاگەهاندنەکێ دا بەحسا وێیەکێ کر، دنها دا شەپۆلەکا نوى یا کۆرۆنایێ بەرەڤ وەلاتى ڤە هاتیە و ل هەمبەر شەپۆلا دوویێ و سیێ ڤایرۆسا کۆرۆنا یێ توند و مەترسیدارترە.
پەیڤدارێ وەزارەتا ساخلەمیا عێراقێ ئاماژە ب وێیەکێ ژى کر، ئەڤ شەپۆلا نوى پێدڤى ب بەرهنگاربوونا زێدەتر و رێکارێن نوى هەیە، گرنگە خەلک ماسکان بکاربینن و دووراتیا دناڤبەرا ئێک و دوو دا ل پێش چاڤ وەربگرن، ژبلى کو گرنگیا وەرگرتنا ڤاکسینى.
سەیف بەدر دیار ژى کر، گرنگە وەلاتى پابەند بن ب رێکار و یاسایێن خۆپارێزیێ یێن تایبەت ب لژنەیا بەرهنگاربوونا کۆرۆنا و داخازێ ژ تەڤایا میدیا و بکارهێنەرێن تۆرێن جڤاکى کریە پەیام و زانیاریێن دروست و هشیارکەر بەلاڤبکەن.
پشتى بەلاڤبوونا ڤایروسێ کۆرۆنا ل سالا ٢٠١٩ێ ل باژێرێ وهانێ چینێ و گەهشتنا عێراقێ، هەیا نها ل عێراقێ ملیۆنەک و ٣٢١ هزار و ٢٣٢ کەس تووشى ڤایروسى بووینە، هەڤدەم، ملۆنەک و ٢٢٦ هزار و ٩٥٩ کەس چارەسەر بوونە و ١٧ هزار و ٦١ کەسێن دى ژى بسەدەما ڤایروسی ژیانا خۆ ژ دەستدایە.
د.ش