فۆتۆ:
2021-06-25
1247 جار خوێندراوەتەوە
لژنەیا دارایی و ئابوورى ل پەرلەمانێ عێراقێ ڕاگەهاند، داکەتنا بهایێ دۆلارى ل هەمبەرى دینارێ عێراقى ب ڕامانا ڤەگەریان بۆ بهایێ ژبەریا نها نینە.
جەمال کۆچەر ئەندامێ لژنەیا دارایی ل پەرلەمانێ عێراقێ ب میدیا یا ناڤخۆیی ڕاگەهاند، لژنەیا دارایی د حەفتیا دەربازبووى دا مێهڤاندارایا پارێزگارێ بانکا ناڤەندى کر و دەربارەى پێنگاڤین کێمکرنا کاریگەریێن گۆهۆرینا بهایێ دۆلارى گۆتۆبێژ کر.
دیار ژى کر، داکەتنا بهایێ دۆلارى ل هەمبەرى دینارى ب ڕامانا وێیەکێ نینە کو جارەکا دى بهایێ وێ ڤەگەریت بۆ بهایێ ژبەریا نها و ١٠٠ دۆلار ب ١١٨ هزار دیناران بیت.
جەمال کۆچەر، ئاماژە ب وێیەکێ ژى کر، تەڤایا دیدار و جڤینان چ مفا نابیت ئەگەر حکومەت و وەزارەتا دارایی و بانکا ناڤەندى پێکڤە بڕیارەکێ نە دەرئێخن دەربارەى بلندکرنا بهایێ دینارى ل هەمبەر دۆلارى.
ئەڤە د دەمەکى دایە، د دەما دەربازبووى دا بانکا ناڤەندیا عێراقێ ڕاگەهاند، کۆژم پێنج ترلیۆن دینار بۆ دروستکرن و تەمامکرنا پرۆژەیێن ئاکنجیبوونێ مەزاختن، کو ئەو دشێت، هاریکاربیت د کێمکرنا رێژا بێکاریێ دا و پتر دەرفەتێ بۆ گەنجان پەیداکەت و کاریگەریێن گۆهورینێن بهایێ دۆلارى کێم بکەت.
لگورى وێ ڕاگەهاندنێ، بڕیار دایە سزایێن توند بدەنە بەر وان بانکان یێن کو پابەندى یاسا و رێکاران نابن، هەڤدەم، دێ کارکەن بۆ کارکرنا گرێدانا وەزارەتا بازرگانى و وەزارەتا دارایی و هەردوو دەستەیێن گومرک و باج ب رێکا هێلا ئینتەرنێتێ.
د مەها کانوونا سالا دەربازبووى دا، بانکا ناڤەندیا عێراقێ ١٠٠ دۆلار ژ نێزیکى ١٢٠ هزار دیناران بۆ نێزیکى ١٤٥ هزار دیناران بلندکرینە و وێ ژى کاریگەرى کریە سەر کار و داهاتێ وەلاتیان و کارڤەدانێن جۆدا ب دویڤ خۆ دا ئینان.
بلندبوونا بهایێ دۆلارى بۆ زێدەتر ژ ١٥٠ هزار دیناران بۆ ئیێکەم جار پشتى سالا ٢٠٠٣ێ ل بازارێن عێراقێ و هەرێما کوردستانێ ل هەمبەر دینارێ عێراقى؛ بلندترین بها تۆماربکەت، کو د نها دا گەهشتەیە وى ئاستى بهایێ ١٠٠ دۆلاران ب ١٤٧ هزار و ٩٠٠ دیناران بازار پێ دهێتەکرن.
د دەما دەربازبووى دا بانکا ناڤەندى ب مەرەما جێگیرکرنا بهایێ دۆلارى ل هەمبەرى دینارى چەندین جاران زێدەتر دۆلار خستەیە د بازارى دا.
د.ش