فۆتۆ:
2021-06-23
589 جار خوێندراوەتەوە
ئەندامەکێ لژنا داراییا جڤاتا نوینەرێن عێراقێ دبێژیت، "مستەحیلە بەغدا چ کۆژمێن پارەی بۆ هەرێمێ بشنیت یان ژی ئەگەر سیاغەکا دی پەیدا بکەت کو بەروڤاژی یاسایا بودجەی نەبیت".
ئەحمەد حاجی ڕەشید، ئەندامێ لژنا دارایی ل جڤاتا نوینەرێن عێراقێ ڕاگەهاند، "پشتی بەلاڤبوونا نووچەیێ شاندنا ترلیۆنەک و ٢٠٠ ملیار دیناران ژ ئالیێ مەسرور بارزانی سەرۆکێ حکومەتا هەرێما کوردستانێ ژ ئالیێ بەغدا ڤە بۆ هەرێمێ گەلەک هیڤی خوازم ئەو نووچەیە ڕاستبیت، لێ ئەز پشت راست بووم کو ئەو بابەتە نەڕاستە، ژبەرکو بڕیارەکا ب وی ئاوی د دەستهەلاتا حکومەتا فیدڕالی دا نینە بڕیارەکێ دەربێخیت بەروڤاژی یاسایا بودجەی بیت، ئەگەر بڕیارێ بەرڤاژی یاسایا پەرلەمانی بدەت لێپرسین دێ دگەلدا هێتەکرن".
وی ئەندامێ لژنا دارایی دجڤاتا نوینەرێن عێراقێ دا بەحسا وێیەکێ ژی کر، موستەحیلە بەغدا چ کۆژمێن پارەی بۆ هەرێمێ بشنیت ئەگەر سیاغەیەکا دی بۆ پەیدابکەن کو بەروڤاژی یاسایا بودجەی نەبیت، لێ هەیا نها چ سیاغێن قانونی نینن، ژبەر وێیەکێ دهەموو حالەتاندا دبیت ب ڕەنگەکێ قەرز بتنێ بۆ ئێک جار بەغدا نێزیکی ٢٠٠ ملیاران بدەتە حکومەتا هەرێمێ، لێ ئەو ژی هێشتا نەهاتیە ئێک ئالی کرن.
حەفتیا دەربازبووی سەرۆکێ حکومەتا هەرێمێ راگەهاند، لهەڤهاتن دگەل بەغدا هاتیەکرن و د تویتەکێ دا ڕاگەهاندبوو، "خۆشحالم ڕابگەهینم کو گەهشتمە لهەڤهاتنەکێ بەشێ بودجا هەرێما کوردستانێ بهێتە زڤراندن، ئەو ژی ژ مەها ئێک یا ئەڤ سالە بهێتە هەژمارتن (أثر رجعي)".
دەما زێدتری دوو مەهانە، بودجەی عیراق هاتیە پەسەندکرن، و پشکا هەرێمێ ژی د بودجەیا عێراقێ دا ب ١٢.٦٧% دیارکریە، لهەمبەر وێیەکێ ژی حکومەتا هەرێمێ هاتیە پابەندکرن ب ڕادەستکرنا ٢٥٠ هزار بەرمیلێن پەترۆلا رۆژانە ب بهایێ سۆمۆ دگەل ڕادەستکرنا نیڤا داهاتێ خالێن سنوری لێ هەیا نها حکومەتا هەرێمێ چ پەترۆل نەشاندیە و حکومەتا فیدڕالی ژی چ کۆژمێن پارەی بۆ هەرێمێ نەشاندنە.
ل هەرێما کوردستانێ ملیۆنەک و ٢٥١ هزار و ٤٥١ مووچەخۆر هەنە، کو ٧٥١ هزار و ٨٠٥ کەس فەرمانبەرێن سەربازی و شارستانی نە؛ ٢٤٢ هزار و ٢٦٩ کەس خانەنشینن. حکومەت ژی بۆ پێدانا مووچەی بێ لێبڕین مەهانە ٨٩٥ ملیار دینار پێتڤی نە.
و.ح