فۆتۆ:
2021-06-21
557 جار خوێندراوەتەوە
ژێدەرەکى ژ ڕێڤەبەریا پارڤەکرنا کارەبا باشور ڕاگەهاند، "تەڤایا وێستەگەهێن بەرهەمئینانا کارەبێ ل سێ پارێزگەهێن باشورێ عێراقێ ژ کارکەفتن".
ئەڤرۆ دووشەمبى، ژێدەرەکى ژ ڕێڤەبەریا پارڤەکرنا کارەبا باشور بۆ ئێن ئاڕ تى ڕاگەهاند، "ل دەمژمێر ٧ێ ڤێ ئێڤارێ تەڤایا وێستگەهێن بەرهەمئینانا کارەبێ ل پارێزگەهێن بەسڕە، میسان، زیقار ژکارکەفتن".
ب گوتنا وى ژێدەرى، (Shut Down) یا تەڤایا وێستگەهان بسەدەما بلندبوونا شەپۆلا ڤۆلتیێ کارەبێ بوویە.
د ڕاگەهاندنەکێ ژى دا وەزارەتا کارەبا عێراقێ، سەدەما قوتبونا وێ بۆ ئاستەنگێن هونەرى ڤەگەران و لگورى وێ ڕاگەهاندنێ، " ل ڤان نێزیکان دێ چارەسەر بییت".
ئەڤە ژى د دەمەکى دایە، د نها دا پلەیێن گەرمێ ل عێراقێ بەردەوام د بلندبوونێ دانە و خاست لسەر کارەبێ زێدەتربوویە، لێ دابینکرنا کارەبێ ل تەڤایا عێراقێ دگەل باژێرێن هەرێمێ ژى بەرەڤ کێمبوونێ دچیت.
د.ش