فۆتۆ:
2021-06-14
105 جار خوێندراوەتەوە
کۆمسیۆنا بلندا سەربەخۆیا هەلبژارتنێن عێراقێ ڕاگەهاند، لگورەی بەلاڤکرنا ئەنجامێن ڤەکولینان دەربارەی بەربژێرێن هەلبژارتنێن داهاتیێن جڤاتا نوینەرێن عێراقێ، پێشبینیى دهێتەکرن هژمارا بەربژێران زێدەتر کێم بکەن.
نیبراس ئەبو سەودە جێگرا پەیڤدارێ کۆمسیۆنا بلندا سەربەخۆیا هەلبژارتنان، د داخۆیانیەکا رۆژنامەڤانى دا ڕاگەهاند، دنها دا، لیستەکا نوى یا تایبەت ب دوورخستنا بەربژێران بۆ هەلبژارتنێن داهاتیێن جڤاتا نوینەرێن عێراقێ د حالێ دا نینە.
دیارکر ژى، دنها دا ڤەکولین ل سەر بەربژێران بەردەوامە و هەیا نها دۆسەیا دوورخستنا هژمارەکا بەربژاران ئێکلا نەکریە.
نبراس ئەبو سەودە ئاماژە ب وێیەکێ ژى کر، دنها دا هژمارا بەربژێران بۆ هەلبژارتنێن پێشوەخت، گەهشتینە سێ هزار و ٥٢٦ کەسان کو بتنێ ٢٥ بەربژار دوورخستنە.
دەربارەی دوورخستنا بەربژێران ئاماژە ب وێیەکێ ژى کر، بڕیارا دوورخستنا وان ٢٥ بەربژێران، بریارەکا دەستپێکییە و بەربژارێن دوورخستى دشێن ل پێش دەستەیا بلندا هەلبژارتنان، تانەیێ لێ بدەن. هەڤدەم، دەربارەی زێدەتر کێمبوونا هژمارا بەربژێران گوت ژى، لگورەی بەلاڤکرنا ئەنجامێن ڤەکولینان کو دەربارەى بەربژێران بۆ هەلبژارتنێن داهاتیێن جڤاتا نوینەرێن عێراقێ ئەنجامدای، هژمارا بەربژێران دێ کێم بیت.
ئەڤە ددەمەکى دایە، بڕیارە ل ١٠ێ مەها تشرینا ئەڤسالە هەلبژارتنێن پێشوەخت ل عێراقێ دێ برێڤەچن و تێدا ٢٥ ملیۆن و ١٣٩ هزار و ٣٧٥ دەنگدەران مافێ دەنگدانێ هەیە د وێ پرۆسەیێ دا.
د.ش