فۆتۆ:
2021-06-13
887 جار خوێندراوەتەوە
ئەندامەکێ لژنەیا دارایی یا پەرلەمانێ عێراقێ ڕاگەهاند، بانکا ناڤەندیا عێراقێ د پێنگاڤەکا دیدا کۆژمێ سێ ملیار دۆلارێن ئەمریکی بۆ جێگیرکرنا بهایێ دۆلاری دێ ئێخیتە د بازاڕی دا.
جەمال کوچەر ئەندامێ لژنەیا دارایی یا پەرلەمانێ عێراقێ ڕاگەهاند، پشتی کو بهایێ دۆلاری و پەتڕۆلێ بلندبووی د عێراقێ دا، بانکا ناڤەندی ئەو پێنگاڤە گرتیەبەر بۆ داکەتن و جێگیرکرنا بهایێ دۆلاری و رێگریکرن ل بلندبوونا بهایێ پێتڤیان و خارنێ.
ئاماژە ب وێیەکێ ژی کر، بانکا ناڤەندی رۆژانە د زێدەکرنا ئاشکەرادا، کۆژمێ ٢٠٠ ملیۆن دۆلاران دفرۆشیت.
ئەڤە د دەمەکی دایە، رۆژا ئەینی، بانکا ناڤەندی بڕیارەکا هەڤئاوا دەرخست بۆ زێدەکرنا کۆژمێ دۆلاری بۆ بانک و نڤیسینگەهێن لهەڤگۆهارتنا پارەی، کو ب وێ سەدەمێ بهایێ دۆلاری ب کۆژمێ ٧٥٠ دینار بۆ هەر ١٠٠ دۆلاران داکەت.
د مەها کانونا ئێکێ یا سالا دەربازبووی دا، بانکا ناڤەندیا عێراقێ بهایێ ١٠٠ دۆلاران نێزیکی ١٢٠ هزار دیناران بۆ نێزیکی ١٤٥ هزار دیناران بلندکر و ڤێ ژی کاریگەری خستە سەر کار و داهاتێ وەلاتیان و کارڤەدانێن جێواز بدیڤ خۆدا ئینان.
بلندبوونا بهایێ دۆلاری بۆ زێدەتر ژ ١٥٠ هزار دیناران بۆ ئێکەم جارە پشتی سالا ٢٠٠٣ێ، ب رەنگەکی کو بهایێ دۆلاری د بازاڕێن عێراقێ و هەرێما کوردستانێ دا هەمبەر دینارێ عێراقێ بلندترین بها تۆماربکەت و د نهادا بگەهیتە وێیەکێ بهایێ ١٠٠ دۆلاران ب ١٥٠ هزار و ٢٠٠ دیناران بازاڕ پێدهێتەکرن.
م.م