فۆتۆ:
2021-06-11
135 جار خوێندراوەتەوە
ئیسماعیل قائانى بەرپرسێ سوپایێ پاسدارێن ئیرانێ ب ئاوایەکێ نهێنى سەرەدانا بەغدا یا پایتەخت کر، ئەڤ سەرەدانە ب ئاوایەکێ نهێنى بوو لێ بوویەرا هێرشا شەڤا دەربازبووى بۆ سەر بالەفڕخانەیا ناڤدەولەتیا بەغدا ئەو نهێنیە ئاشکەراکر.
میدیایێن عەرەبى بەلاڤکریە، دوهى چارشەمبیێ قائانى ب ئاوایەکێ نهێنى سەرەدانا بەغدا کریە و دگەل سەرکردێن حەشدا شەعبیى جڤیایە.
سەرەدانا وى بەرپرسێ سوپایێ پاسدارێن ئیرانێ هەڤدەمە دگەل ئازادکرنا قاسم سالح سەرکردێ حەشدا شەعبى کو د چەند رۆژێن دەربازبووی دا ب توهمەتا کوشتنا چالاکڤانان هاتبوو دەستەسەرکرن.
هەروەسا هەڤدەمە دگەل هێرشا شەڤا دەربازبووى بۆ سەر سەربازگەها بەلەد و بالەفڕخانەیا ناڤدەولەتیا بەغدا ژ ئالیێ گروپێن چەکداریێن نێزیکى ئیرانێ ڤە.
ئەڤە ژى چارەمین سەرەدانە کو ئیسماعیل قائانى ئەنجامبدەت بۆ عێراقێ پشتى کوشتنا قاسم سولەیمانى و وەرگرتنا وى پۆستى.
هەر د شەڤا دەربازبووی دا، سێ بالەفڕێن بێ بالەفڕڤان هێرشی سەر بالەفڕخانەیا ناڤدەولەتیا بەغدا کرن و ئێک ژ بالەفڕان ژی ئێخستنە خارێ.
رۆژا ٢٦ێ مەها دەربازبووى، دژەتیرۆرا عێراقێ ب پشت گرێدان ب بڕیارا دادگەهێ و یاسایا رویبرویبوونا "تیرۆر"ێ و توهمەتا کوشتنا چالاکڤانان و خۆنیشاندەران قاسم موسیلح دەستەسەرکر و ڤێ بڕیارێ تورەبوونا بەشەک ژ هێزێن حەشدا شەعبى بدویڤ خۆ دا ئینان و بۆ دەمکی دەرازینکا دەڤەرا کەسکا بەغدا هاتە کۆنترۆلکرن هەیا بڕیار دای وی فەرماندەی ڕادەستى فەرماندەیا ئۆپەراسیۆنێنن هەڤبەشێن عێراقێ بهێتەکرن و دوهى ژى، قاسم موسلیح فەرماندەیێ هێزێن حەشدا شەعبى ب بڕیارا دادوەرى هاتە ئازادکرن.
د.ش