فۆتۆ:
2021-06-07
180 جار خوێندراوەتەوە
رۆژا شەمبیێ تورکیا ب بالەفڕێن بێ بالەفڕڤان بۆمبەبارانا ئۆردوگایا پەنابەرێن مەخمور کر، سەرۆکێ تورکیا د تویتەکی دا ڕاگەهاند، "دکتۆر حسێن بەرپرسێ پەکەکێ ل ئۆردوگایا مەخمور هاتیە کوشتن"، کەسەکێ دناڤ پەکەکێ ژى دا دبێژیت، مە چ کەس بناڤێ دکتۆر حسێن ل کەمپا مەخمور نینن.
رۆژا شەمبی، بسەدەما بۆمبەبارانا بالەفڕێن بێ بالەفڕڤان بۆ سەر کەمپا مەخمور، سێ کەسان ژیانا خۆ ژ دەستدا و هژمارەکا دى ژى برینداربوون.
رەشاد گەلالی بەرپرسێ کۆمیتا مەخموورا یەکێتیێ بۆ ئێن ئاڕ تی ڕاگەهاند، بۆمبەبارانا ل باخچەکێ زارۆکان دایە و ب وێ سەدەمێ ژى، سێ کەسان ژیانا خۆ ژ دەستدایە و دوویێن دى ژى برینداربوون کۆ رەوشا ساخلەمیا وان خرابە.
تویتەرێ ئەردۆغانی
تورکیا کو بەردەوام ئۆردوگایا مەخمور ب جهەکێ بۆ لخۆگرتنا تیرۆرێ ناڤ دکەت، ٢٤ دەمژمێران پشتى بوویەرێ، ڕەجەب تەیب ئەردۆغان، سەرۆکێ تورکیا د تۆڕا جڤاکیا تویتەری دا ڕاگەهاند، "سەلمان بۆزقیر کو ب دکتۆر حسێن بەرنیاسە و بەرپرسێ گشتى یێ پارتا کرێکارێن کوردستانێ بوویە ل ئۆردوگایا مەخمور، ژ نیشکەکێ ڤە د بۆمبەبارانا روژا شەمبیێ دا ل تورکیا بۆ وێ ئۆردوگایێ، دکتۆر حسێن هاتە کوشتن".
لگورەی میدیایێن تورکیا، سلێمان بۆزکیر کو بەرنیاس ب دکتۆر حسێن ل سالا ١٩٩٠ێ ل رێزێن پەکەکێدا چالاکە و کارێن وێ ڕێکخراوێ ل ئەورۆپا ب ڕێڤەبرنە و دەمەکێ ژى ل بەریتانیا بەرپرسێ پەکەکێ بوو ل وى وەلاتى، هەڤدەم، داویی ئەرکێ وى ڕێڤەبەرێ رێکخستنێن پەکەکێ بوو لکەمپا مەخمور.
دهەمبەردا نێچیرفان مەحمود حوسەین، ئەندامێ کۆمیتەیا دیپلۆماسیا کەمپا مەخمور یان کەمپا شەهید ڕۆستەم، د هەڤپەیڤینەکێ دا دگەل بەشێ کوردى یێ دەنگێ ئەمریکا کۆشتنا وى بەرپرسى ڕەتکر و گۆت، "رۆژا شەمبیێ ل دەوروبەرێن دەمژمێر ١:٥٥ بۆ ٢:٠٠ ئەو هێرش ئەنجامدایە و چ زیانەکا گیانى نەبوو، وێنە و بەلگە هەنە، هەر ژ دەستپێکێ مە گازى هێزێن عێراقێ کر بۆ ڤەکۆلینێ ل وێ بوویەرێ لێ ل دەمژمێرێن دەستپێکێ نەهاتن".
پشتى بوویەری هێزێن عێراقێ سەرەدانا جهێ تۆپبارانا کریە و هەیا نها دەرئەنجامێن وێ نەهاتینە ئاشکەران.
لگورەی وێنەیان کو دچرکەیێن دەستپێکێ یێن بوویەرێ دا دەست ب ئێن ئاڕ تى کەفتین، ئەو جهێن هاتینە بۆمبەبارانکرن گۆرەپانا یاریگەها خاندنگەهێ یە، گۆرەپانەک بەرفرەهە.
نێچیرڤان دبێژیت، پارچەیێن موشەکان هەر ل وێرێ نە و وێنە وەک بەلگە، ڕاستیان دووپاتدکەن و دبێژیت، "بۆمبەبارانا وێ دەڤەرێ ب رێکەفت نەبوو، ئەو دەڤەرا بۆمبەبارانکرى جهێ یاریگەها زارۆکانە و هەمی زارۆکێن وێ ئۆردوگایێ ل وێرێ خۆلا پەروەردەیێ هەیە". و وەک ئاماژە پێدایی، "بخۆشحالى ڤە د دەما بۆمبەبارانێ دا چ زارۆک ل وێرێ نەبوون.
مە دکتۆر حسێن نینە!
ئەو ئەندامێ کۆمیتەیا دیپلۆماسى یا کەمپا مەخمور رەتدکەت، چ کەسەک بناڤێ دکتۆر حسێن د وێ ئۆردۆگایێ دا هەبیت، "بانگەشەیا ئەردۆغانى ڕاست نینە، ئەڤە هەمى بەشەکە ژ پیلان و سیاسەتێن ئەردۆغانى بۆ داگیرکرنا کوردستانێ".
نێچیرڤان دبێژیت، "ئاکنجیێن کەمپا مەخمور دوی دەمیدا ئاوارەبوون، و بوونە پەنابەر، هەمى ئەڤ تشتە و مەترسیێن وەکى مرنێ، کوشتنێ، تێهنیبوونێ و برسیبوونێ ل بەرچاڤێن خۆ دانایە".
کەمپا مەخمور دکەڤیتە نێزیکى باژێرکێ مەخمور سەر ب پارێزگەها نەینەوا ڤە، ل سالا ١٩٩٤ێ وەرە هژمارەک ژ خێزانێن کوردێن باکورێ کوردستانێ د وێ کەمپێ دا دژین کو ئۆپوزیسیۆنێن دەولەتا تورکیانە، هژمارەیا ئاکنجیێن وان ب ١٢ هزار کەسان دهێتە خەملاندن.
د.ش