فۆتۆ:
2021-06-05
149 جار خوێندراوەتەوە
شێورمەندێ سەرۆک وەزیرێن عێراقێ بۆ کاروبارێن ئابورى ڕاگەهاند، بۆدجەیا فیدرالى بۆ سالا دارایی یا ٢٠٢٢ێ دێ دوو بڕگە جۆدابن ژ یاسایا بۆدجەیا ئەڤسالەدا، ئێک ژ وان بڕگەیان دیارکرنا بهایێ پەترۆلێ یە.
مەزهەر محەمەد سالح شێورمەندێ مستەفا کازمى سەرۆک وەزیرێن عێراقێ بۆ کاروبارێن ئابورى بۆ میدیا یا فەرمیا عێراقێ راگەهاند، ڕەشنڤیسا بودجەیا گشتى یا فیدرالى بۆ سالا ٢٠٢٢ێ دوو مادە دێ جۆدابن ژ یاسایا بودجەیا ٢٠٢١ێ، ماددێ ئێکێ ژى پەیوەندى ب داهاتێ پەترۆلێ ڤە هەیە، وەک بهایێ بەرمیلەکا پەترۆلێ و بڕێ دهێتە شاندن و فرۆتنا پەترۆلێ، ئەو ژى ب ل بەچاڤگرتنا رەوشا ئەرێنیا بازارێ وزێ و ئاسایی بوونا ئابورێ جیهانێ بۆ قوناغا پشتى کۆرۆنایێ دهێتە دیارکرنێ.
گۆت ژى، "پەیوەندیەکا بهێز دناڤبەرا بلندبوونا گەشەیا ئابوریا جیهانێ و بلندبوونا خواستا ل سەر پەترۆلا خاڤ د بازارێن وزێ و بلندبوونا بهایێ وێ هەیە".
شێورمەندێ کازمی بەحسا وێ چەندێ ژى کر، "ماددێ دووێ کو بودجەیا سالا داهاتى ژ بودجەیا ئەڤسالە جۆدادکەت، ئەوە عێراق دێ روی ب روى کێمترین دەین و کورتئانین بیت، ددەمەکیدا مەزاختنا پارەیی بۆ پرۆژەیێن وەبەرئانین و گەشەکرنا دەڤەرێن جۆدا جۆدا دێ هێتە زێدەکرن، سەدەما وێ ژى زێدەبوونا داهاتیە".
هەڤدەم، دەربارەی هەلبژارتنێن پێشوەخت د مەها تشرینا ئێکێ یا ئەڤسالەدا و پاشکەفتنا پەسەندکرنا بودجەیێ، مەزهەر محەمەد سالحى ئاشکراکر، ل گورى دەستورى مەها تشرینا ئێکێ یا ئەڤسالە دەما پەرلەمانى دێ ب داویی هێت و دێ ئامادەکار هێنەکرن بۆ رۆینشتنا خولا نوى یا هەلبژارتنا پەرلەمانى، ددەمەکیدا ئەگەر بێی پەسەندکرنا بودجەیێ بچیتە سالا ٢٠٢٢ێ، ئەو ێک ل سەر بودجەیا ئەڤسالە دێ هێتە مەزاختن و ئاریشە دروستنابن، لێ پرۆژەیێن نوى ناهێنەئەنجامدان.
د.ش