فۆتۆ:
2021-05-31
301 جار خوێندراوەتەوە
وەزیرێ ژێدەرێن ئاڤێ یێ عێراقێ ڕاگەهاند، شاندەکێ عێراقێ بۆ گۆتوبێژێن بڕینا ئاڤا عێراقێ ژ ئالیێ دەستهەلاتدارێن ئیرانێ ڤە، ب ژڤانە د چەند رۆژێن بهێت دا سەرەدانا تەهران بکەن، دبێژیت، "ئالیێ ئیرانێ ب ژڤانە وێ دوسیێ ب لهەڤهاتنا جەزائیری یا سالا ١٩٧٥ێ ڤە گرێدەت".
مەهدی رەشید حەمدانی وەزیرێ ژێدەرێن ئاڤێ یێ عێراقێ ئاشکەراکر، ئالیێ ئیرانێ دڤێت وێ دوسیا ئاڤێ ب لهەڤهاتنا جەزائیرێ ڤە گرێدەت، کو ل سالا ١٩٧٥ێ دناڤبەرا ئیرانێ و عێراقێ هاتبوو ئیمزاکرن و بڕگەکا تایبەتە ب دابەشکرنا ئاڤێ ڤە.
حەمدانی بەحسا وێیەکێ کر، عێراق بزاڤان دکەت دوسیا ئاڤێ ژ لهەڤهاتنا جەزائیرێ جۆدابکەت، لێ بەرپرسێن تەهرانێ د رژدن لسەر وی بابەتی دکەن.
وەزیرێ ژێدەرێن ئاڤێ یێ عێراقێ ئەوژی دیارکر، چ لۆژیک نینە ئیران کوژمەکێ زۆر یێ ئاڤێ د ئاخاخۆدا عەمباربکەت و نەهێلیت بۆ عێراقێ بهێتە بەردان، چونکی ئەو رەفتارە بەروڤاژی یاسایا ناڤدەولەتیە.
ل ٦ی ئادارا ١٩٧٥ێ حکومەتا عێراقێ ب نوینەرایەتیا سەدام حسێن سەرۆک کۆمارێ عێراقێ یێ وی دەمی و محەمەد رەزاشایێ پەهلەوی ب سەرپەرشتیا هۆواری بۆمدین سەرۆکێ وی دەمی یێ جەزائیر لهەڤهاتنەکا ستراتیژی هاتە ئیمزاکرن و تێدا بڕیار هاتەدان لگورەی هیلا تالۆک، یا دەستنیشانکرنا ژێدەر و رێڕەوێن ئاڤێ ئاریشا ئاڤێ دناڤبەرا خۆدا چارەسەربکەن.
ئەڤە د دەمەکی دایە، ب سەدەما هشکەسالیێ و کێم بارانیێ هەر ئێک ژ عێراق و ئیران روی ب روى قەیرانا ئاڤێ بووینە. هەڤدەم، ب سەدەما گرتنا ئاڤێ ژ ئالیێ ئیرانێ و تورکیا ڤە کاریگەری د چەند حەفتیێن دەربازبووی دا ب ئاشکەرایی لسەر پارێزگەها دیالە و هەرێما کوردستانێ و رۆیبارێن دیجلە و فورات دەرکەفتیە و ب وێیەکێ ژى ئەڤ قەیرانە ل عێراقێ کویرتر کریە.