فۆتۆ:
2021-05-22
192 جار خوێندراوەتەوە
جڤاتا ئاسایشا ناڤدەولەتی یا سەر ب نەتەوێن هەڤگرتی لسەر داخازیا حکومەتا عێراقێ، د رۆژێن بهێت دا دێ گۆتۆبێژان لسەر پرسا هەلبژارتنێن ئەڤسالە یێن عێراقێ و رێگریکرنێ ل سەختەکاریان کەت.
ئەڤرۆ شەمبی، عەبدولحسێن هەنداوی شێورمەندێ سەرۆک وەزیرێن عێراقێ بۆ کاروبارێن هەلبژارتنان، ب میدیایێن فەرمی یێن وەلاتی ڕاگەهاند، تایبەت بۆ پرسا چاڤدێرکرنا هەلبژارتنێن ئەڤسالە یێن پەرلەمانێ عێراقێ، مستەفا کازمی سەرۆک وەزیرێن وەلاتی 'سێ جارا' داخاز ژ جڤاتا ئاسایشا ناڤدەولەتی کریە ب مەرەما چاڤدێریکرنا هەلبژارتنێن ئەڤسالە ژ ئالیێ وێ جڤاتێڤە.
دەربارەی بەرسڤا جڤاتا ئاسایشا ناڤدەولەتی ژی عەبدولحسێن هەنداوی ڕاگەهاند، پێشبینی دکەین بەرسڤەکا ئەرێنی بیت، دبێژیت ژی، چاڤدێری کرن ژ ئالیێ جڤاتا ئاسایشێ ڤە، چ باندووریەکێ ل سەروەریا عێراقێ ناکەت و لژنەیا بلندا سەربەخۆیا هەلبژارتنان جێبەجێکارا راستەوخۆیا پرۆسێیە نە حکومەتا عێراقێ.
رۆژا ١٦ی کانونا دووێ یا ئەڤسالە، سکرتێرێ گشتیێ نەتەوێن هەڤگرتی، سولرون گیشلادۆتری وەک نوینەرێ تایبەتێ وێ رێکخراوێ بۆ کاروبارێن سیاسی و بەرپرسێ هەلبژارتنێن عێراقێ هاتە دەستنیشانکرن.
هەڤدەم، ل رۆژا ١٧ی ئادارێ ژیدا، کومسیۆنا بلندا هەلبژارتنان ئەشکراکر، داخازنامە بۆ ٧٥ بالیۆزخانەیێن عەرەبی و بیانی و رێکخراوێن ناڤدەولەتی هنارتینە ب ئارمانجا چاڤدێریکرنا پرۆسەیا هەلبژارتنان، بۆ هندێ پرۆسە ب تەمامی پاقژ و شەفافانە بڕێڤە بچیت.
ئەڤە ددەمەکیدایە، بڕیارە ١٠ی تشرینا ئێکێ یا ئەڤ سالە ل عێراقێ هەلبژارتنێن بەروەختێن پەرلەمانێ عێراقێ بڕێڤە بچن، پێتڤیە سێ رۆژان بەرێ وی دەمی پەرلەمانێ عێراقێ خۆ ب هەلوەشینیت.