فۆتۆ:
2021-05-20
336 جار خوێندراوەتەوە
وەزارەتا ساخلەمیا عێراقێ ڕاگەهاند، داکەتنا رێژەیا توشبوونێ ب ڤایرۆسێ کۆرۆنایێ ب هەڤبەرکرن ب دەمێ دەربازبووی بۆ هندێ ڤەدگەریت کو پشکەکا زێدە یا خەلکی توشی ڤایرۆسی بووینە و پشترا چارەسەربووینە، دبێژت ژی، "ئەو ڤاکسینێن ئیناینە عێراقێ، تێرا تەڤایا ئاکنجیان ناکەن".
ریاز عەبدولئەمیر ڕێڤەبەرێ گشتیێ ساخلەمیێ ل وەزارەتا ساخلەمیا عێراقێ ڕاگەهاندیە، ب ڕێژەیەکا بەرچاڤ هژمارا توشبوویان بەر ب کێمیێ یە، ئەو کێمبوونەژی بسەدەمێ وەرگرتنا ڤاکسینی نینە، بەلکو بسەدەمێ وێیەکێ یە پتریا وان کەسێن کو مەترسی ل سەر بوو توشی ڤایرۆسی بووینە.
ریاز عەبدولئەمیر ئاماژە ب وێیەکێ ژی کریە، ژ کوما ٤٠ ملیۆن وەلاتیان، نێزیکی ٥٠٠ هزار کەسان ڤاکسین بکارئینایە، کو ئەڤەژی دبیتە رێژەیا ٢% یا ئاکنجیان و ئەگەر نیزیکی ٦٠% ئاکنجی ڤاکسینی وەربگرن کۆرۆنا دێ هێتە کۆنتڕۆلکرن و دێ رێگری ل بەلاڤبوونێ هێتە کرن.
ل پشتی بەلاڤبوونا ڤایرۆسێ کۆرۆنایێ هەیا نها، ملیۆنەک و ١٥١ هزار و ٥٥٧ کەس ل عێراقێ و هەرێما کوردستانێ توشی کۆرۆنایێ بووینە، ملیۆنەک و ٦١ هزار و ٩٧٥ ژ وان توشبوویان چارەسەربووینە، ٧٣ هزار و ٥١٣ توشبوویێن کۆرۆنایێ هێشتا چارەسەریێ وەردگرن و ١٦ هزار و ٦٩ توشبوویێن کۆرۆنایێ ژی ژیانا خۆ ژ دەستدایە.