فۆتۆ:
2021-04-25
409 جار خوێندراوەتەوە
حکومەتا عێراقێ ب سەدەمێ بوویەرا نەخۆشخانەیا ئیبن خەتیبە سێ رۆژ وەک ماتەمینیا سەرانسەری ڕاگەهاندیە و بوویەر ژی ب "لێدان ل ئاسایشا نەتەوەیی" وەسفکریە. هەڤدەم، سەرۆکوەزیران ژی گەفا سزادانا وان هەمی کەسان دکەت یێن کێمترخەمی کری.
ئەڤرۆ ئێکشەمبی، حکومەتا عێراقێ ڕاگەهاندنەک بەلاڤکر و تێدا سێ رۆژێن ماتەمینیێ بسەدەمێ رویدانا ئاگربەربوونێ ب نەخۆشخانەیا ئیبن خەتیبی یا تایبەت ب کۆرۆنایێ ل تەڤایا وەلاتی ڕاگەهاند.
لگورەی وێ ڕاگەهاندنێ، مستەفا کازمی سەرۆکوەزیرێن عێراقێ د کڤانێ جڤینا نە ئاسایی دا ڕاگەهاند، ئەڤ رەنگێ بوویەران بەلگەنە لسەر وێیەکێ کو کێمترخەمی هەیە و پێتڤیە دەملدەست هەمی ڤەکۆلین دەستپێ بکەن و هەر ئێک ژ ڕێڤەبەرێ نەخۆشخانێ و ئاسایشێ و بەشێ وەرشەیا نەخۆشخانێ و هەرکەسێ پەیوەندی ب بوویەرێ هەبیت و بدەرکەڤیت کێمتر خەمی کریە دێ لێپرسین و ڤەکۆلین دگەل هێنە کرن.
ڕاگەهاند ژی، "نابیت چ کەسەک بێژیت ئەڤە شۆرتەکێ کارەبێ بوو، ئەڤە شەرمزاریە، ژ نها و پاشدا هەر فەرمانگەهەکا ب شۆرتێ کارەبێ ئاگر بەرببیتێ دێ ڤەکۆلین دگەل هەمی کارمەندێن وێ هێتە کرن".
ئەوژی دیارکر، پێتڤیە د دەما ٢٤ دەمژمێراندا ڤەکۆلین لسەر بوویەرێ بهێنەکرن و ئەنجام بهێنە ئەشکەراکرن و ئەوێن کێمترخەمی کری بهێنە سزادان.
ئاماژە بوێیەکێ کر، کێمترخەمی کرن و پشتگوهـ ئێخستنا ڤان جورە کاران خەلەت نینە، بەلکو تاوانە، ژبەر وێیەکێ پێتڤیە هەمی ئەوێن کێمترخەمی کری بەرپرسیاریێ ب ستۆیێ خۆڤە بگرن.
هەڤدەم، داخاز کر لژنەیەکێ ژ تەڤایا وەزارەتان بهێتە پێک ئینان بۆ دیڤداچوون و پشکنینێن رەوشا سلامەتیێ بۆ تەڤایا نەخۆشخانە و ئوتێل و جهێن گەشتیاری د دەما ئێک حەفتی دا ل سەرانسەری عێراقێ دا بهێنە ئەنجامدان.
دبێژیت، پێتڤیە هەر فەرمانگەهەک و ڕێڤەبەریەک ڕێڤەربەر بخۆ پشکنینان بۆ فەرمانگەها خۆ بکەت و سلامەتیا فەرمانگەها خۆ دەستنیشان بکەت.
ئەڤە د دەمەکیدایە، شەڤا دەربازبووی ڕێڤەبەریا بەرەڤانیا باژێری یا بەغدا بەلاڤکریە، ئاگر ب نەخۆشخانەیا ئیبن خەتیبی یا تایبەت ب چارەسەربوونا کۆرۆنایێ ل دەڤەرا پرسی یا دیالە ل بەغدا کەفتیە و ب وێ سەدەمێ نێزیکی ٢٣ کەسان ژیانا خۆ ژدەستدا و دەهێن دیژی برینداربوون و نەخۆشخانە هاتە چولکرن.