فۆتۆ:
2021-04-08
376 جار خوێندراوەتەوە
راوێژکارێ ئاسایشا نیشتمانی یا عێراقێ ڕاگەهاند، ئەمریکا سوز دا یە ژمارەیەکا بەرچاڤ ژ سەربازێن خۆ ل عێراقێ ڤەکێشیت و ل گورەی لهەڤهاتنا دناڤبەرا عێراق و ئەمریکا ب چەند قۆناغا چ بنگەهێن هێزێن بیانی ل عێراقێ نامینن.
قاسم ئەعرەجی راوێژکارێ ئاسایشا نیشتمانی یا عێراقێ ڕاگەهاندن ئەمریکا سوزا ڤەکێشانا ژمارەیەکا بەرچاڤا سەربازێن خۆ ژ عێراقێ دایە و ل میانا دیالوگا ستراتیژی دناڤبەرا عێراق و ئەمریکا دا ژی بەحس ژ وێ پێشکەفتنێ کریە کو هێزێن وان ل شەرێ دژی تیرورێ دا خۆ بدەستئینایە.
قاسم ئەعرەجی بەحس ژ وێ یەکێ ژی کریە، "لسەر وێ یەکێ لهەڤهاتین هێزێن ئێمناهیێ ئەرکێ شەرێ دژی داعش ل دەستێ وان بخۆ دا بیت و هەردوو ئالی لسەر وێ لهەڤهاتن کو چ بنگەهێن بیانی ل عێراقێ دا نەمینن."
هەڤدەم، ل ڕاگەهاندنا هەڤبەشا ئەمریکا و عێراقێ دەربارەی گەرا سێیێ یا دیالوگا ستراتیژی یا دناڤبەرا واندا، گوتیە، هەردوو ئالی تەکەست ل پەیوەندیێن دووقۆلی یێن بهێزێن دناڤبەرا واندا کریە.
ئاماژە ب وێ یەکێ ژی کریە، شاندێ هەردوولا بیاڤێن ئاسایش و بەرهنگاربوونا تیرۆر و بیاڤێ ئابوری و وزە و ژینگە و پرسێن سیاسی و پەیوەندیێن دوو قۆلی شروڤەکرینە.
دوهی چارشەمبی، گەرا سێیێ یا گوتوبێژا ستراتیجی دناڤبەرا عێراق و ئەمریکا برێکا ڤیدیۆکۆنفرانسی برێڤەچوو، هەڤدەم، دۆسیێن ئێمناهیێ و بەرهنگاربوونا تیرورێ، د بیاڤێن پەروەردە و کەلتور ل دۆسیەیێن سەرەکیێن ناڤ گوتوبێژان بوون.
هـ.ر