فۆتۆ:
2019-02-16
1094 جار خوێندراوەتەوە
ل باژارێ ئەنقەرەیا پایتەختا تورکیایێ، پارتیا دەمۆکراتیک یا گەلان "هەدەپێ" بەیانامەیا هەلبژارتنێن شارەداریان کو بریارە د ٣١ێ ئادارێ دا بێن لدارخستن ب کۆنفرانسەکێ ئاشکرا کر و سەزایی تەمەلی و پەروین بولدان هەڤسەرۆکێ هەدەپێ، بەربژارێن هەڤشارەداریان، نونەرێن سازیێن سڤیل و رۆژنامەڤان ژی تەڤلی کۆنفرانسێ بوون.
د بەیانامەیا هەدەپێ یا هەلبژارتنان دا ، ٣١ێ ئادارێ وەکی ریفراندۆما دیمۆکراسیێ هاتە بناڤکرن و بانگا تێکۆشین و لهەمبەردەرکەتنا ئاکەپێ هاتە کرن.
هەروەسا هاتە گۆتن کو دیمۆکراسیا هەرێمی بنگەها سیاسەیا هەدەپێ یە و د شارەداریێن هەدەپێ دا، ئیرادەیا گەل، رێزگرتنا هەموو جوداهیان خالەکا سەرەکیە و هەر کەس دێ خزمەتەکا یەکسان و وەکهەڤ ببینە و چ کەس نایێ ڤەدەرکرن.
د بەیانامەیا هەدەپێ دا بەحسا وێ یەکێ هاتە کرن کو هەدەپە دێ لدژی هەژاریێ تێبکۆشە، بنگەها جڤاکی دێ بێ خورتکرن، دێ هەژمارا شارەدارێن ژن زێدە بکن، دێ مافێ زارۆکان بپارێزن و دەرفەتەکا زێدە بدن گەنجان.
مافێ هەموو زیندەوەران، پاراستنا ژینگەهێ، ئالیکاریا جۆتکار و پێشخستنا ئاژەڵداریێ ، باشکرنا رەوشا تەندروستیێ، رێزگرتنا هەموو نێرین و باوەری و ئۆلان، خزمەتا پڕزمانی، و لهەمبەردەرکەتنا توندوتیژیا لهەمبەر ژنان و زارۆکان، د بەیانامەیا هەدەپێ یا هەلبژارتنان دا جهێ خوە دگرە.
هەلبژارتنێن ٣١ێ ئادارێ
هەلبژارتنێن شارەداری و موختاران، کو وەکی هەلبژارتنێن هەرێمێ ژی تێن بناڤکرن، بریارە د ٣١ێ ئادارا ٢٠١٩ان دە بێنە کرن.
هەلبژارتنێن شارەداری و موختاران، دێ جارەکی دن هەڤکێشەێن ناڤخوەیی یێن تورکیا و باکورێ کوردستانێ بگۆهەرینە و ب تایبەتی ڤێ جارێ هەڤرکیەکا گەلەک مەزن د ناڤبەرا هەدەپێ و ئاکەپێ دا تێ دیتن.
چ قاس ژی زەخت و فشارێن حکومەتێ لهەمبەر شارەداری و سازیێن کوردان ل باکورێ کوردستانێ، بەردەوام بوون، لێ پشتی هێرشا داعشێ، بۆ سەر کۆبانێ د مەها یەک " چلەیا" سالا ٢٠١٤ێ دە و شەرێ ناڤ باژارێن باکورێ کوردستانێ د سالێن ٢٠١٥ و ٢٠١٦ان دە، ب بڕیارەکا تایبەت، دەست ب گرتنا شارەدارێن کورد و دانانا کارمەندێن حکومی " قەیومان" لشوونا شارەدارێن کورد هاتە کرن.
کورد د سالا ٢٠١٤ان دە ب رێیا پارتیا هەرێمان یا دەمۆکراتیک "دەبەپێ" تەڤلی هەلبژارتنێن هەرێمی بوون.
دەبەپێ کاری د هەلبژارتنان دە ١٠٢ شارەداریان بدەست بخن کو د ناڤا وان دە ١١ شارەداریێن ناڤەندا باژاران هەبوون.
پارتیا هەرێمان یا دەمۆکراتیک "دەبەپێ"، شارەداریێن "دێرسم، ئامەد، مێردین، باتمان، جۆلەمێرگ، ئاگری، ئیدر، وان، شرنەخ و سێرتێ" و ٩١ ناڤچەیێن دن یێن باکورێ کوردستانێ بدەست خست و سیستەما هەڤسەرۆکیێ کو ژ وان رە "هەڤشارەدار" دهات گۆتن، د شارەداریان دا هاتە بجهکرن.
چ قاس زەخت و فشار ل سەر شارەداریان بەردەوام بوون، لێ پشتی داربەیا ١٥ێ تیرمەها ٢٠١٦ان دە، فشارێن حکومەتێ ئاستەکا پیڤانەیی تۆمار کر. د دەمەکێ کێم دا قەیوم هاتن ئامادەکرن و شارەدارێن کورد ژی هاتن گرتن.
وێ دەمێ د کۆنفرانسەکا چاپەمەنیێ دە، بەرپرسێن پارتیا هەرێمان یا دەمۆکراتیک، دانزانین، لشوونا ٩٤ شارەدارێن وان، قەیوم "کارمەندێن حکومی" هاتنە دانین و ٦٨ شارەدار ژی هەیا نها د گرتیگەهان دانە.
لگۆری ئامارێن دەبەپێ، زێدەتر ژ دوو هەزار کارمەند و خەباتکارێن ئالیگرێن دەبەپێ، بێکار مان و بوو سەدەما بێکاریەکا زێدە د ناڤا باژارێن باکورێ کوردستانێ دە.
هـ.ج